Gjykata për Krime të Rënda shtyu seancën ndaj Saimir Tahirit pasi në dosje mungonte përkthimi i dëshmive të të pandehurve, Moisi Habilaj dhe Nezar Seiti.
Gjatë seancës gjyqësore, ish ministri kërkoi që seanca e sotme të mos shtyhej ndërsa tha se hiqte dorë nga këto dëshmi që ishin në favor të tij vetëm që gjykimi të vazhdonte, ndërsa sipas avokatit të Tahirit, nuk është e vërtetë që këto dokumente nuk janë përkthyer, ndërsa citoi korrespondencën e Ministrisë së Drejtësisë me Prokurorinë.
Në një komunikatë me mediat Tahiri foli me tone të ashpra lidhur me mungesën e seriozitetit të Prokurorisë, ndërsa shtoi se është e papranueshme që arsyeja të jetë “humbja e letrave”, ndërsa shton me ironi se dhe një çerdhe është më e organizuar.
“Ky proces është shtyrë për të tretën herë, edhe një çerdhe është me e organizuar se kaq. Nuk e di sesi mund të humbasin letrat në Prokurori, dhe nuk di sesi mund të vazhdohet kështu dhe se çfarë serioziteti ka. Nuk dua ta di nëse është e qëllimshme apo gabim njerëzor, por kjo është qesharake. Nëse është e qëllimshme, është shumë banale. Shpresoj të jetë mungesë vëmendje. Unë heq dorë nga disa dëshmi që janë në favorin tim, por mjafton të mos shtyhet më. Procedim penal që nisi me kërkesë për arrestimin tim dhe sot letrat janë zhdukur, kjo është qesharake. Nuk ndodh as në dyqanin me të rëndomtë, e jo më në prokurorinë e Krimeve të Rënda. Është tepër i shtyrë gjyqi për herë të tretë, qesharake, poshtëruese për drejtësinë… Nëse letrat humbin në këtë mënyrë, Republika ka rënë. Por herët a vonë do ia dal.”, u shpreh Tahiri./Opinion.al
