Një krim i rëndë ka ndodhur në një familje shqiptare në Brescia të Italisë.
55-vjeçari Shkelqim Bedeli, ka vrarë fillimisht bashkëshorten e tij, Shegushe Paeshti dhe më pas është vetëvrarë. Ngjarja ka ndodhur në banesën e tyre në Cazzago San Martino (Brescia).
Mediat italiane raportojnë se krimi kishte disa ditë që kishte ndodhur dhe kufomat e çiftit shqiptar kishin nisur të dekompozoheshin.
Do të jetë autopsia e cila do të tregojë se kur ka ndodhur ngjarja, ditën kur burri mbyti gruan e tij duke e varur në kangjellat e shtëpisë dykatëshe dhe momenti kur ai i dha fund jetës.
55-vjeçari pas krimit kishte lënë edhe dy letra, të shkruara në kompjuter.
Njëra drejtuar fëmijëve të tij dhe tjetra autoriteteve policore. Në letër ai shpjegon se kishte mosmarrëveshje të pakapërcyeshme në çift dhe se për të mënyra e vetme për t’i dhënë fund kësaj situate ishte vetëm vdekja.
Trupat e pajetë janë zbuluar nga karabinierët e Brescias. Fëmijët e çiftit, aktualisht me pushime, kishin njoftuar policinë, pasi prindërit nuk iu ishin përgjigjur telefonatave të tyre për disa ditë.
