Pas mbërritjes së delegacionit kuqezi nga “Paris 2024”, ka folur në një konferencë për mediat Fidel Ylli, kreu i Komitetit Olimpik Kombëtar Shqiptar.
Ai përgëzoi mundësit për rezultatet, pasi për herë të parë vendi ynë siguroi dy medalje Olimpike.
Ndër të tjera ai ia drejtoi këtë mesazh Kuvendit, duke thënë se sportistët janë ambasadorët më të mirë të Shqipërisë dhe qeveria duhet që të bëjë më shumë.
“Të nderuar pjesëmarrës, miq dhe të ftuar. Sot është një ditë e rëndësishme për sportin shqiptar. Shqipëria ka hyrë në listën e medaljeve olimpike, falë Dudaev dhe Valiev, që ngritën flamurin kuqezi në Paris, gjë që ne e kishim ëndërruar. Të gjithë bashkë u munduam, këtu falenderoi edhe Seit Prizrenin, kreun e Federatës së Mundjes.
Këta sportistë janë ambasadorët më të mirë të Shqipërisë dhe ky është një mesazh për Kuvendin dhe qeverinë që të bëjnë më shumë. Synimi ynë ishte një medalje Olimpike dhe ia dolëm. Dua t’i falenderoj të gjithë për kontributin e tyre”, tha Fidel Ylli.
