Katër ditë përpara zgjedhjeve fushata paraqitet e tensionuar në qarkun e Dibrës. Në sherre dhe konflikte janë përfshirë militantët e PD dhe të PDIU-së. Në fushatën e PDIU-së rezultojnë të angazhuar edhe persona me uniformë. Kështu, në mëngjes u arrestua polici Demir Deda pasi është konfrontuar fizikisht me militantë të PD-së, ndërsa vetë ishte pjesë e stafit të PDIU-së, raporton Opinion.al.
Sakaq në mesditë, Ministria e Brendshme njofton se ministri teknik Dritan Demiraj ka udhëruar shkarkimin nga detyra të punonjësit të Gardës së Republikës, Florian Lala pasi ka marrë pjesë aktive në fushatën e PDIU-së në qarkun e Dibrës.
“Efektivi i Gardës së Republikës në shkelje të statusit të tij dhe nenit 332/a të Kodit Penal, “Shpërdorimi i autoritetit policor” ka marrë pjesë aktive në fushatën elektorale të një subjekti politik, më konkretisht Partisë për Drejtësi, Integrim dhe Unitet në qarkun e Dibrës. Efektivi Florian Fatbardh Lala është liruar menjëherë nga detyra”, thuhet në njoftimin e ministrisë.
Po kështu në lidhje me sherrin mes militantëve që ka ndodhur pas mesnate në Dibër, ministri Demiraj thotë se ka ndjekur nga afër operacionin e SHÇBA-së për arrestimin në flagrancë të shtetasit Demir Deda, punonjës policie në Durrës, i cili ishte i përfshirë në fushatën elektorale të subjektit politik, PDIU, në Dibër duke shkaktuar incidente me subjekte të tjera politike.
Jo vetëm kaq, ministri Dritan Demiraj deklaron se Drejtori i Policisë në qarkun Dibër Edmond Targaj nuk ka marrë masat e nevojshme duke cenuar besueshmërinë e punës së Policisë së Shtetit, ndaj i tërheq vemendje publikisht.
Ministri i Brendshëm Dritan Demiraj u bën thirrje gjithashtu partive të shmangin incidentet, duke mos angazhuar në fushatë persona të cilëve iu ndalohet një aktivitet i tillë dhe të mbajnë larg aktivitetit elektoral persona me rekorde kriminale, pasi do të ketë tolerancë zero. /Opinion.al
