Armenia dhe Azerbajxhani raportuan të martën për përleshje kufitare në shkallë të gjerë që lanë të vdekur një numër ende të panjohur trupash të Azerbajxhanit.
Luftimet, shënojnë përplasjen e fundit mes dy armiqve të mëdhenj, pas shpërthimit të një luftë në vitin 2020 mbi rajonin e kontestuar Nagorno-Karabakh. Ndërkohë palët fajësojnë njëra-tjetrën për sulmet.
“Në orën 00:05 të mëngjesit të martën, Azerbajxhani filloi granatimet intensive, me artileri dhe armë zjarri të kalibrit të lartë, kundër pozicioneve ushtarake armene në drejtim të qyteteve Goris, Sotk dhe Jermuk,” -tha ministria e mbrojtjes e Armenisë.
Në një deklaratë, ajo u shpreh se Azerbajxhani kishte përdorur gjithashtu drone.
Por ministria e mbrojtjes e Azerbajxhanit akuzoi Armeninë për “akte luftarake në shkallë të gjerë” pranë rretheve të Dashkesan, Kelbajar dhe Lachin në kufi. Ka humbje në mesin e ushtarakëve (azerbajxhanë)”, thuhet në njoftim, pa dhënë shifra.
Sakaq, Shtetet e Bashkuara të Amerikës bënë thirrje për t’i dhënë fund konfliktit të hënën mbrëma, me Sekretarin e Shtetit Antony Blinken, i cili u shpreh se SHBA është “thellësisht e shqetësuar” për situatën, duke përfshirë “sulmet e raportuara kundër vendbanimeve dhe infrastrukturës civile” në Armeni.
“Siç e kemi bërë të qartë prej kohësh, nuk mund të ketë zgjidhje ushtarake për konfliktin,” tha Blinken në një deklaratë. “Ne kërkojmë që menjëherë t’i jepet fund çdo armiqësie ushtarake.”
