Prokuroria e Durrësit, ka nisur hetime për Drejtorinë Arsimore Rajonale Kavajë si dhe për drejtuesit e Shkollës “Rilindja”pasi ishin të informuar për skandalin por nuk e denoncuan .
Sipas të miturës stafi pedagogjik ishte në dijeni rreth abuzimit, por nuk e kanë denoncuar në struktura të tjera shtetërore. Më tej mësohet se institucionet arsimore u informuan për ngjarjen e rëndë pesë ditë para se vajza të bënte denoncimin në polici.
Në vendimin e gjykatës së Durrësit thuhet se pasi u informua për ngjarjen, mësuesja e thirri nxënësen e mitur, duke i kërkuar t’i fliste për marrëdhënien me një nga djemtë e klasës. Në bisedë, vajza i ka rrëfyer asaj se ishte abuzuar seksualisht nga disa prej djemve të shkollës, të cilët e kërcënonin me publikimin e videos, në të cilën ajo shfaqej duke kryer marrëdhënie me të dashurin e saj.
Në këto kushte, mësuesja thirri nënën e vajzës dhe në prani të drejtoreshës e psikologes së shkollës, i ka treguar gjithcka kishte ndodhur. Institucioni u mjaftua me kaq. Heshti për ngjarjen, pasi nuk e denoncoi krimin tronditës në polici./E.M
