(Ministrja, Xhulieta Kërtusha)
Ministrja e Mirëqenies Sociale dhe Rinisë, Xhulieta Kërtusha, me anë të një shkrese, i ka kërkuar sot Departamentit të Administratës Publike nisjen, në mënyrë të menjëhershme, të procedurave për largimin nga shërbimi civil të Luneda Sufali, me funksion Sekretar i Përgjithshëm në Ministrinë e Mirëqenies Sociale dhe Rinisë për shkak të shkeljeve shumë të rënda të kryera me dashje dhe në mënyrë të përsëritur siç është parashikuar nga neni 57 pika 2 i ligjit nr. 152/2013 “Për nëpunësin civil”.
Ministrja Kërtusha i ka përcjellë DAP prova dhe fakte që tregojnë se sjelljet dhe veprimet krejtësisht antiligjore, të cilat janë në kundërshtim të plotë me parashikimet e nenit 15 të ligjit nr. 90/2012 “Për Organizimin dhe Funksionimin e Administratës Shtetërore”, kanë sjellë ngadalësim, paqartësi dhe kanë krijuar pengesa të njëpasnjëshme në mbarëvajtjen e punës së Ministrisë Mirëqënies Sociale dhe Rinisë.
Në kërkesën drejtuar DAP janë renditur një numër rastesh ku znj. Sufali në cilësinë e Sekretares së Përgjithshme ka penguar me qëllim mbarëvajtjen e punës së Ministrisë, duke sjellë pasoja negative të rënda, përsa i përket pritshmërisë së rezultateve të punës, që dëshmojnë mosrealizime të dëmshme për interesat e ligjshme të shtetit, shtetasve dhe personave juridikë. Sekretarja e Përgjithshme e MMSR-së në mënyrë të përsëritur dhe me dashje ka refuzuar sistematikisht të kryejë detyrat funksionale, gjë që ka sjellë pasoja shumë të rënda në funksionimin e Institucionit dhe në besimin që qytetarët kanë kunderjt Institucionit.
Znj. Sufali, ka penguar ushtrimin e funksioneve dhe detyrave të Ministrit, të përcaktuar nga Kushtetuta e RSH-së, nga Ligji për Organizimin dhe Funksionimin e Këshillit të Ministrave Nr. 9000, datë 30.01.2003 si dhe nga aktet e tjera ligjore dhe nënligjore. Një nga pasojat e rënda që rrjedhin nga sjellja antiligjore e Sekretarisë së Përgjithshme është vonesa që i është bërë pagesave për kategorinë e të përndjekurve politikë. Znj. Sufali ka ushtruar presion ndaj zyra e Financës duke penguar të gjitha pagesat të cilat janë detyrim ligjor. Më poshtë do të gjeni të listuara një sërë shkeljesh të kryera nga ana e znj. Luneda Sufali në cilësinë e Sekretares së Përgjithshme të Ministrisë së Mirëqenies Sociale, të cilat i janë përcjellë Departamentit të Administratës Publike.
a)Sekretari i Përgjithshëm nuk zbaton urdhrat verbalë të Ministrit në lidhje me mbarëvajtjen e punës duke u bërë presion dhe propagantë punonjësve dhe Institucioneve të varësisë duke ju thënë se asnjë praktikë ligjore, me afat apo pa afat, nuk do të procedohet nga strukturat vartëse pasi Ministri aktual do të ushtrojë funksione gjer më datë 25 dhe më pas do të rikthehet ish-Ministri paraardhës.
b)Publikon në mënyrë të kundraligjshme të gjitha aktet dhe urdhrat e Ministrit duke cënuar rëndë sigurinë e aktit dhe shkelur etikën e mirë-administrimit shkresor, madje duke rrezikuar nivelin e informacionit.
c)Ka fshehur në mënyrë abuzive shkresa hyrëse drejtuar Ministrit, shkresa të cilat kishin dhe afate ligjore për miratimin dhe kthimin e përgjigjes.
d)Sekretari i Përgjithshëm, duke mos njohur funksion e saj të përcaktuar në ligj, tenton të pengojë detyrën e Ministrit të Mirëqenies Sociale dhe Rinisë duke tentuar në mënyrë të papërgjegjshme me anë të disa memo-ve të ulë figurën e Ministrit në strukturat vartëse apo dhe mediatikisht.
e)Pengon funksionimin dhe vënien në zbatim të akteve të tjera nënligjore në funksion dhe në zbatim të VKM nr. 473 datë 01.06.2017.
f)Refuzon të firmosë urdhëra dhe shkresa pasi janë punuar dhe firmosur nga specialistët përkatës, drejtorët e drejtorive dhe drejtorët e përgjithshëm.
g)Kontrollohet në mënyrë abuzive gjithë posta hyrëse dhe dalëse e Ministrit duke ushtruar presion dhe kontroll tek zyra e protokollit. Pas delegimit nga ana e Ministrit për shkresat përkatëse, duke ju bërë presion të vazhdueshëm protokollit, ndryshon delegimin e shkresave të bëra nga Ministri.
h)Ushtron presion dhe kontroll verbal tek zyra e Financës duke penguar të gjitha pagesat të cilat janë detyrim ligjor dhe duke lejuar pagesa selektive të përzgjedhura prej saj. Prej shumë kohësh është vonuar pagesa e të përndjekurve politikë. Sekretari i Përgjithëm i mban praktikat në zyrë mbi dhjetë (10) ditë në mënyrë abuzive dhe pa i deleguar në drejtoritë përkatëse për shqyritimin e tyre.
i)Sekretari i Përgjithshëm refuzon të firmosi çdo shkresë, përfshi dhe shkresat drejtuar Kryeministrit të cilat kanë të bëjnë me mbarëvajtjen e punës të përditëshme në këtë Ministri.
j)Sekretari i Përgjithshëm pengon çdo urdhër për Audit që lëshohet nga ana e Ministrit,
k)Sekretari i Përgjithshëm refuzon të firmos urdhërat për emërimet e Këshilltarëve të Ministrit,
l)Sekretari i Përgjithshëm ka firmosur akte (urdhëra) që janë kompetencë e Ministrit të Mirëqenies Sociale dhe Rinisë, (referencë neni 102 dhe urdhëri i mëparshëm nr 175, datë 02.08.2016 i ish Ministrit z. Klosi) pa patur asnjë autorizim apo delegim nga Ministri sipas përcaktimeve të ligjit nr 9000, datë 30.01.2003 për funksionimin e KM.
m)Në kundërshtim me Vendimin e Këshillit të Ministrave nr. 473, datë 1.6.2017, Sekretari i Përgjithshëm nuk ka zbatuar dhe ndjekur Urdhërin e firmosur për pezullimin e Lejeve Vjetore të Nëpunësve, Punonjësve dhe Funksionarëve të Ministrisë së Mirëqënies Sociale dhe Rinisë, si dhe të Institucioneve të Varësisë, për Periudhën 01.06.2017- 25.06.2017, detyrim ky i padiskutueshëm nga mosbzatimi i të cilit është krijuar një situatë e pa menaxhueshme teknikisht për më tepër në afate kohore kaq të shkurtra. Sekretari i Përgjithshëm me memon 3189/1, datë 02.06.2017 në mënyrë tërësisht jo ligjore e kundërshton këtë urdhër duke refuzuar zbatimin dhe ndjekjen e këtij urdhëri.
