55 firma janë hedhur në kërkesën, që PS ka ndërmarrë për shkarkimin e Ilir Metës nga posti i Presidentit të Republikës. Tek firmëtarët janë zv.kryeministri Erjon Brace, kryetari i grupit parlamentar socialist Taulant Balla, deputetet Shalsi, Çuçi, Bushati si edhe të gjitha deputetet gra të kësaj force.
Lista është gati prej 13 qershorit, por socialistët ende nuk e kanë depozituar në Kuvend. Kryetari i Komisonit të Ligjeve la të hapur mundësinë që kërkesa të depozitohet të hënë.
Ky është hapi i parë i procedurës për shkarkimin e një presidenti, së cilës edhe nëse do t’i shkohet deri në fund do të duhet një kohë shumë e gjatë. Ndërkohë për këtë zhvillim ka ardhur një reagim ashpër nga Presidenca.
Zëdhënësi i Presidentit, në një reagim në rrjetet sociale shkruan se Ilir Meta është zgjedhur President nga një Parlament plotësisht legjitim, jo nga ky i sotmi.
“Ilir Meta është zgjedhur President nga një Parlament plotësisht legjitim, jo nga ky i sotmi. Nga momenti që ai është betuar me dorën mbi Kushtetutë i përket vetëm Republikës. Mocioni i “çunave të Shijakut” që kërkon të instalojë “Narko-Republikën” e bandave dhe oligarkëve do të marrë përgjigjen e merituar nga qytetarët e Republikës së Shqipërisë. Shqipëria e para!Shqipëria si gjithë Europa!”
Në një tjetër zhvillim, Presidenti i Republikës, Ilir Meta ka kërkuar nga KQZ informacion në lidhje me gjendjen dhe përbërjen aktuale të Parlamentit, pikërisht në një moment kur nuk janë të paktë ata që besojnë se ai po bëhet gati të shpërndajë Parlamentin.
KQZ ende nuk i ka kthyer përgjigje shkresës së Metës, ndërsa mazhoranca nëpërmjet kryetarit të grupit parlamentar socialist, Taulant Balla nuk ka vonuar në përgjigjen për këtë skenar.
“Presidentit i ka hipur vetja në qejf dhe ka hapur edhe haberin se gjoja do të shpërndajë Parlamentin. Se çfarë Kushtetute ka Presidenti këtë nuk e di, por kam hall mos ka ngatërruar Kushtetutën me bllokun e zi”, u shpreh Taulant Balla./ Opinion.al
