Trupi i pajetë i një 20-vjeçari, shqiptar i Kosovës, është gjetur mëngjesin e sotëm në një kanal që përshkon Kalkion, një komunë në Bergamo të Italisë.
Ai është identifikuar si Erion Morina nga Malisheva e Kosovës. Policia vendase ka zbardhur dinamikën e ngjarjes dhe ka arrestuar një person i cili dyshohet të ketë kryer krimin.
20-vjeçari Morina, mbrëmjen e së enjtes ishte në një bar dhe pasi ishte larguar nga aty bashkë me një person tjetër, mes tyre ka patur një konflikt fizik dhe me sende të forta. Personi tjetër, i cili është zbuluar se është gjithashtu nga Kosova e ka goditur Morinën me një send të fortë pas koke dhe më pas e ka tërhequr rreth 50 metra para se ta hidhte në kanal. Për të ndihmuar karabinierët në rindërtimin e asaj që menjëherë dukej si vrasje ishin gjurmët e gjakut të gjetura në një trotuar para një bari ku edhe nisi sherri midis dy burrave.
Trupi i viktimës u vu re mëngjesin e sotëm nga një kalimtar, i cili pikasi kufomën duke notuar në ujë menjëherë pas orës 7 të mëngjesit. Ai u transportua në morg ku do t’i nënshtrohet autopsisë për të përcaktuar saktë shkaqet e vdekjes. /Opinion.al
