Ka ndërruar jetë pacienti i dytë me COVID-19 në Shqipëri.
Ministria e Shëndetësisë ka njoftuar se viktima është 66-vjecari nga Lushnja i cili ishte shtruar prej disa ditësh në spitalin infektiv.
“Mëngjesin e sotëm ndërroi jetë pacienti i shtruar në spitalin Infektiv, i konfirmuar me COVID-19, i cili ishte në gjendje të rëndë, në respirim të drejtuar në reanimacion. 66-vjeçari nga Lushnja prej disa ditësh ishte i shtruar në shërbimin Infektiv, në gjendje të rëndë. Pacienti vuante nga disa sëmundje shoqëruese: insuficenca kardiake, edemë pulmonarë dhe insuficencë renale”, njofton Ministria e Shëndetësisë.
Kjo është viktima e dytë e koronairusit në Shqipëri pas gruas 73-vjecare nga Durrësi.
Aktualisht në Shqipëri janë 55 raste të konfirmuara me koronavirus. Nga këta 2 kanë ndërruar jetë dhe 24 janë shtruar në spitalin Infektiv ku 2 janë në terapi intensive. / Opinion.al
