Partia Demokratike ka vendosur të dërgojë në Gjykatën Kushtetuese ligjin e ‘Vetting’-ut, një ditë pasi hyri në fuqi.
Referuar PD-së, ky ligj, i jep qeverisë kontrollin politik mbi organet që do të vendosin për pastërtinë e gjyqtarëve dhe prokurorëve.
Nënkryetari i Komisionit të Posaçëm për Reformën në Drejtësi, Oerd Bylykbashi është shprehur se: “Ligji i ‘Vetting’-ut është një ligj që ka probleme thelbësore me Kushtetutën. Sigurisht që ne kemi studiuar të gjitha aspektet, me të cilat ky ligj mund të përballet në Gjykatën Kushtetuese.
Nga burime konfidenciale, mësohet, se ligji i ‘Vetting’-ut është miratuar, gërmë për gërmë, sipas rekomandimeve të dy misioneve teknike të asistencës së BE-së dhe SHBA-së, si dhe, drafti i shqyrtuar u hartua nga ekspertët ndërkombëtarë në përputhje të plotë me kushtetutën e re, ndërsa, deputetët e mazhorancës në komision, nuk kanë prekur qoftë edhe një nen të vetëm.
Nga ana tjetër, ministrja për Marrëdhëniet me Parlamentin Ermonela Felaj tha për ‘Report Tv’, se opozita nuk ka për t’u bërë pëngesë në realizmin e një reforme kaq të rëndësishme.
“Fakti që opozita mëse një herë ka ngritur pretendimin që për ligje të caktuara do të shkojnë në gjykatën kushtetuese nuk besoj që kjo duhet të përbëjë një merak për të mos realizuar në kohën e duhur të gjithë atë çfarë kërkohet nga ne për të realizuar ose nga komisioni i posaçëm i reformës në drejtësi. Ajo është zgjedhje e opozitës le të shohim si do t’i ushtrojë opozita këto. Nuk do të krijohet asnjë ngërç. Fakti që opozita kërkon të punojë me një shpejtësi të ndryshme me atë të cilën kërkon të punojë qeveria nuk ka për tu bërë pengesë në realizimin e një reforme kaq të rëndësishme”, është shprehur Felaj.
Procesi i rivlerësimit të figurës së gjykatësve e prokurorëve në sistem, aktualisht, do jetë tërësisht në duart e Operacionit Ndërkombëtar të Monitorimit, i koordinuar nga Brukseli që do të emërojë në krye të tij një prej zyrtarëve me përvojë.
Ky Operacion ka marrë të drejta të plota për të mbikqyrur procesin, mbledhur të dhëna përmes hetimeve brenda e jashtë vendit dhe në koordinim të ngushtë me agjenci ligjzbatuese në Evropë e SHBA.
Në fakt, a është kjo, pika e fortë kyçe e kontestimit të PD-së?
Deri më sot, prokurorë e gjykatës në sistem, nuk janë hetuar kurrë seriozisht, janë përfshirë në veprimtari të paligjshme dhe kanë vënë e transferuar para të paligjshme, krijuar nga kjo veprimtari.
Por secili prej tyre individualisht dhe në grup-si trupa hetuese e gjykuese, kanë kryer shërbime të qarta “ligjore” për politikën, duke ndërtuar një sistem të qartë të pandëshkueshmërisë që është sot problemi më i madh për Shqipërinë./Opinion.al/
