Lulzim Basha ka paraqitur sot vizionin e Partisë Demokratike për shëndetësinë. Basha u shpreh se problemet e shëndetësisë nuk kanë lindur sot, por sot shqiptarët paguajnë më shumë për të dhe marrin shërbim më të dobët. Lulzim Basha tha se programi i majtë i “shëndetësisë falas” ka rezultuar një dështim, ndërsa kryeministri dështimin ia faturon profesionistëve.
“Problemet në shëndetësi nuk lindën sot, por shqiptarët sot paguajnë më shumë për shëndetësinë dhe sistemi sot renditet i fundit në Ballkan. Po përmend këtu indeksin e konsumatorit të shërbimit dhe kujdesit ndaj pacientit, që thotë se sistemi shëndetësor në Shqipëri është primitiv. Në 3 vitet e fundit Shqipëria ndodhet në sistemin shëndetësor me të keq në Europë. Treguesit kanë ardhur në përkeqësim prej 2013, në raport me vendet e rajoni. Problemi tjetër është ulja e numrit të mjekëve, që e ka larguar shërbimin nga njerëzit. Në spitalet periferike kanë mbetur vetëm godinat dhe shtretërit. QSUT-ja është e mbingarkuar. Kjo është shoqëruar me cirkun e përditshëm të përgjegjësit për këtë situatë që akuzon profesionistët, të njëjtën gjë që bën me universitetet, me sipërmarrjet. Nga një gënjeshtër e madhe si shëndetësia falas, tërë dështimin mundohet t’ia faturojë profesionistëve. Mjekët përpiqen në kushte spitalesh lufte”, ka thënë Basha në konferencën rajonale të organizuar në Tiranë nga Fondacioni “Konrad Adenauer” mbi sfidat dhe vizionin në sistemin e shëndetësisë./Opinion.al
