Bota

SHBA: Rusia ka financuar me 500 mije $ PD në Shqipëri në vitin 2017



Bëhu pjesë e Grupit Zyrtar të Opinion.al
>> KËTU <<
               Publikuar në : 09:11 - 14/09/22 |
Opi Nion

Rusia ka shpenzuar më shumë se 300 milionë dollarë që nga viti 2014 për të rritur ndikimin e saj tek politikanët në më shumë se 24 vende, pretendon SHBA.

Sipas BBC, pretendimi i Departamentit Amerikan të Shtetit bazohet në një vlerësim të deklasifikuar të inteligjencës amerikane të publikuar të martën.

Një zyrtar i lartë nga administrata e Presidentit Joe Biden tha: “Ne mendojmë se kjo është vetëm maja e ajsbergut”.

Rusia nuk ka komentuar publikisht për këtë çështje, por vetë Moska ka akuzuar vazhdimisht SHBA-në për ndërhyrje jashtë vendit.

Inteligjenca amerikane “vlerëson se këto janë shifra minimale dhe se Rusia ka të ngjarë që të ketë transferuar edhe më shumë fonde në mënyrë të fshehtë në raste që kanë mbetur të pazbuluara”.

Vlerësimi i inteligjencës amerikane tha se financimet përfshinin vende nga katër kontinente.

Zyrtari i administratës tha se komuniteti i inteligjencës amerikane tani po informonte privatisht vendet mbi financimin e supozuar të fshehtë rus. Konferencat do të mbeten konfidenciale, shtoi zyrtari.

Një burim i administratës i njohur me gjetjet pretendoi se Rusia kishte shpenzuar rreth 500,000 dollarë për të mbështetur Partinë Demokratike të qendrës së djathtë të Shqipërisë në zgjedhjet e vitit 2017 dhe gjithashtu financoi partitë ose kandidatët në Bosnjë, Mal të Zi dhe Madagaskar, sipas agjencisë së lajmeve AFP.

Burimi tha gjithashtu se Kremlini kishte përdorur Brukselin si një qendër për fondacionet dhe frontet e tjera që mbështesin kandidatët e ekstremit të djathtë.

Kompanitë fiktive thuhej se përdoreshin për të financuar partitë evropiane dhe për të rritur ndikimin rus.

Autoritetet ruse deri më tani nuk kanë bërë asnjë deklaratë publike mbi pretendimin e SHBA.

Moska ka fajësuar më parë agjencinë amerikane të inteligjencës CIA për ndërhyrje në punët e vendeve të tjera, duke përfshirë mbështetjen e grushteve të ndryshme të shteteve në mbarë globin./Opinion.al

 

 

Pas