Bota

SHBA marrëveshje paqe me talibanët, kur pritet të nënshkruhet


               Publikuar në : 13:20 - 21/02/20 |
el ida

Sekretari amerikan i Shtetit, Mike Pompeo deklaroi se marrëveshja e paqes mes Shteteve të Bashkuara dhe talibanëve në Afganistan do të nënshkruhet më 29 shkurt.

“Shtetet e Bashkuara dhe talibanët janë angazhuar në bisedime për të lehtësuar një zgjidhje politike, për t’i dhënë fund konfliktit në Afganistan si dhe për të zvogëluar praninë e SHBA-së në rajon”, thuhet në deklaratën e Pompeos.

Marrëveshja vjen pas më shumë se një viti bisedimesh midis përfaqësuesve të talibanëve dhe atyre të Shteteve Bashkuara.

Në dhjetor të vitit 2018, talibanët njoftuan se do të takohen me zyrtarë amerikanë në përpjekje për të gjetur një “udhërrëfyes për paqen”. Megjithatë, ata refuzuan bisedime zyrtare me qeverinë afgane, duke i cilësuar ata si “kukulla” të perëndimit.

Pas 9 raunde bisedimesh në Katar, negociatori i lartë i Uashingtonit njoftoi në shtator të vitit 2019, se SHBA-ja do të tërhiqte 5.400 trupa nga Afganistani brenda 20 javësh.

Por, vetëm disa ditë më vonë, presidenti amerikan, Donald Trump, tha se bisedimet kishin “vdekur”, pasi grupi militant mori përgjegjësinë për vrasjen e një ushtari amerikan.

Forcat amerikane janë në Afganistan që prej pushtimit më 2001, që kishte për qëllim rrëzimin e talibanëve nga pushteti./Opinion.al

Pas