Gjykata e Lartë e Shteteve të Bashkuara të martën i ka hapur rrugën presidentit Donald Trump të zbatojë politikën e tij për ndalimin e transgjinorëve në shërbimin ushtarak.
Gjykata votoi me 5 vota pro dhe 4 kundër, për t’i dhënë “dritën jeshile” kërkesës së administratës “Trump” që të hiqte urdhrat bllokues ndaj politikës së tij teksa sfidat ligjore vijojnë në gjykatat më të ulëta.
Të katër gjykatësit liberalë të Supremes votuan kundër në këtë vendim, por shumica konservatore triumfoi.
Politika e shefit të Shtëpisë së Bardhë ndalon “personat transgjinorë, që kërkojnë apo i janë nënshtruar ndryshimit të gjinisë” nga të shërbyerit në ushtri.
Administrata e Trump kishte apeluar për një vendim të përshpejtuar në lidhje me rastin, të cilin Gjykata e Lartë nuk pranoi ta merrte në konsideratë.
Në vitin 2017, presidenti Trump shkaktoi habi me njoftimin e tij në Tëitter, ku bënte të ditur se individë transgjinorë nuk do të lejoheshin më të shërbenin në radhët e ushtrisë, në asnjë kapacitet.
Ish-Sekretari amerikan i Mbrojtjes, James Mattis e ripërkufizoi politikën duke e limituar atë vetëm për individët transgjinorë me një histori disforie (parehatie) gjinore, apo kur seksi biologjik i individit dhe identiteti nuk përputheshin. Ai tha se politika e re do të bënte përjashtime për disa qindra persona transgjinorë, të cilët ose shërbejnë aktualisht, ose dëshirojnë të shërbejnë “në seksin e tyre biologjik”.
Aktualisht numërohen rreth 8.980 trupa transgjinorë në detyrë, sipas të dhënave të Departamentit të Mbrojtjes, të analizuara nga një organizatë jofitimprurëse e politikave publike, “Palm Center”./BBC-/Rel.d/
