Deputetja e Partisë Demokratike, Jorida Tabaku ka reaguar në lidhje me vendimin e SPAK për sekuestrimin e inceneratorit të Tiranës.
Përmes një postimi në rrjete sociale, Tabaku thotë se vendimi për të sekuestruar kompaninë e inceneratorit të Tiranës është i vonuar, por i mirëpritur.
Ajo shkruan se tani mbetet dërgimi para drejtësisë i personave përgjegjës që kanë firmosur dhe alokuar miliona euro nga buxheti i shtetit dhe bashkive për një instalacion korrupsioni.
Ndër të tjera, Tabaku thekson se incenerimi është një vepër korruptive që nuk duhet kryhej dhe një provë e gjallë e korrupsionit me vlerë 430 milion euro.
“Një vendim i vonuar por i mirëpritur sekuestrimi i Inceneratorit të Tiranës nga SPAK. Fatkeqësisht qeveria shqiptare duhet të kishte ndaluar pagesat për një kontratë që u nis me një kosto 128 milion euro të taksave shqiptare dhe u bitis me një vlerë 399 milion euro.
Tanimë detyra tjetër mbetet dërgimi përpara drejtësisë të përgjegjësve të tjerë që kanë firmosur dhe alokuar miliona euro nga buxheti i shtetit dhe bashkive për një instalacion korrupsioni.
Një vit e gjysmë më parë në vendin ku sot është realisht një skenë krimi, denoncova dhe faktova në sy të shqiptarëve së bashku me kolegët e mi atë që tanimë është e qartë; së pari ishte një vepër korruptive, incenerimi nuk kryhej dhe së dyti ishte një provë e gjallë e korrupsionit me vlerë 430 milion euro.
Koha po vërteton se monopoli i shkaktuar nga Bashkia e Tiranës për dherat që duhet të hidhen në atë incenerator por edhe kostoja që paguajnë shqiptarët për një shërbim që nuk kryhet është një abuzim i dyfishtë.
Me gjithë këto arsye sërishmi milionat e taksës së korrupsionit paguheshin nga xhepat e shqiptarëve. Çdo qytetar i Tiranës, Durrësit, Kavajës, Vorës, Rrogozhinës paguante dyfish për një shërbim që nuk e merrte. Paguante dyfish për mobilimin dhe vilat e një sëre të korruptuar që sot duhet të përgjigjet më shumë se kurrë”, shkruan Tabaku.
