Sekretari amerikan i Shtetit, Mike Pompeo vizitoi krejt papritur Irakun, ku është takuar me zyrtarët irakianë dhe ka diskutuar shqetësimet e Shteteve të Bashkuara për sigurinë, duke përmendur ato që i ka cilësuar si aktivitete “përshkallëzuese” të Iranit.
Vizita e Pompeos në kryeqytetin e Irakut ka ardhur një javë pasi Shtetet e Bashkuara kanë njoftuar për pozicionimin e pajisjeve ushtrake në Lindje të Mesme, hap që është konsideruar si përgjigje ndaj kërcënimit me të cilin përballen forcat amerikane dhe aletët e tyre në rajon.
Pompeo ka thënë në Bagdad se inteligjenca amerikane ka qenë shumë specifike rreth sulmeve që janë të pashmangshme. Teherani në anën tjetër ka hedhur poshtë raportimet për kërcënime duke i cilësuar po ato si “luftë psikologjike”.
Pas takimit me presidentin irakian, Barham Salih dhe kryeministrin, Adil Abdul-Mahdi, Pompeo u ka thënë gazetarëve:
“Ne kemi biseduar për rëndësinë që ka Iraku në të garantuarit e sigurisë dhe për mbrojtje të amerikanëve në shtetin e tyre”.
Ai shtoi se qëllimi i takimit ka qenë për të informuar liderët irakianë për kërcënimin në rritje që SHBA-ja ka vërejtur në rajon. Sa i përket vendimit për të angazhuar forca shtesë në Lindje të Mesme, Pompeo ka thënë se mesazhi që u kanë dërguar iranianëve ka qenë i qartë dhe se shpreson që Irani të mendojë dy herë, para se të sulmojë interesat amerikane.
Tensionet në mes të Teheranit dhe Uashingtonit janë përshkallëzuar mjaft prej kur presidenti amerikan, Donald Trump u tërheq një vit më parë nga marrëveshja bërthamore që Irani ka nënshkruar me fuqitë botërore më 2015. Përveç kësaj Trump ka rikthyer të gjitha sanksionet ndaj këtij shteti duke i prekur sektorin e naftës dhe atë bankar./Opinion.al
