Ditën e sotme zhvilloi punimet Samiti i Ballkanit Perëndimor në Poznan, të Polonisë, në të cilin morën pjesë liderët nga Ballkani Perëndimor dhe BE për të diskutuar mbi të ardhmen e rajonit në kuadrin e integrimit për në Bashkimin Europian.
Në këtë Samit mori pjesë edhe Sekretarja e Përgjithshme e Këshillit të Bashkëpunimit Rajonal, Majlinda Bregu, e cila është shprehur gjatë fjalës së saj se Ballkani Perëndimor duhet të nisë një axhendë të gjerë dhe lehtësuese, ku përfshihet lëvizja e lirë e njerëzve përmes ID-ve, mallrave, shërbimeve.
Po ashtu, Sekretarja e Përgjithshme e Këshillit të Bashkëpunimit Rajonal shtoi se Ballkanit Perëndimor duhet t’i hiqen dhe pengesat për investimet.
“Rajoni ynë duhet të fillojë një agjendë serioze dhe të gjerë të lehtësimit, e cila do të përfshijë aspekte të lëvizjes së lehtësuar të njerëzve, mallrave, shërbimeve dhe kapitalit. Ballkani Perëndimor duhet të lëvizë lirshëm përmes ID-ve dhe të heqë pengesat strukturore për tregti dhe investime. Është koha që të përfshihet një mekanizëm adekuat i Schengen-it në Ballkanin Perëndimor për të lehtësuar udhëtimin në të gjithë rajonin dhe duke hapur rrugën për tranzicion gradual në lëvizjen e lirë të qytetarëve. Liria e lëvizjes është një parakusht thelbësor për integrimin ekonomik rajonal. RCC është këtu për të marrë pronësinë”, – tha Bregu./ Opinion.al E.Xh.
