Pjatat e dekoruar bukur dhe me kujdes shijojnë më shumë. Sallata Mimoza është një nga ato pjata që të kënaq jo vetëm stomakun por edhe syrin. Mësoni si përgatitet
Përbërësit:
200 gr proshutë
200 gr djathë kaçkavall
5 vezë të ziera
200 gr majonezë
1 – 2 ajkë e thartë
4 patete të ziera
pak rrepka të kuqe
kripë
Përgatitja:
Pastrojmë mirë patatet, i ziejmë dhe më pas i heqim lëkurën. Pastrojmë gjithashtu vezët.
Grijmë në rende proshutën. Përziejmë bashkë ajkën e thartë dhe majonezën.
Në një enë dekorative prej qelqi vendosim një shtresë me patate të grira dhe i shtojmë pak kripë. Sipër shtresës së patateve vendosim përzierjen e majonezës dhe ajkës së thartë.
Shtojmë proshutën me rende (e cila mund të zëvendësohet me raste me sallam) dhe e lyejmë sipër me ajkë dhe majonez.
Grijmë në rende 2 vezë të plota dhe djathin kaçkavall. Veçmas, grijmë në rende të bardhat e 3 vezëve të tjera. Masën e grirë të vezëve të plota e hapim në gjithë sipërfaqen e enës.
Shtojmë djathin e grirë kaçkavall, ndërsa 3 të verdhat e mbetura të vezëve i grijmë veç dhe i vendosim në mes të sallatës.
Për dekorimin e enës ndajmë pak nga të bardhat e vezëve dhe i ngjyrosim me lëngun e rrepkave të kuqe. Më pas vendosim fletë majdanozi, toptha nga të bardhat e vezëve, si dhe nga të bardhat e vezëve të ngjyrosura.
Në fund, dekorimit i shtojmë fletë majdanozi dhe sallata është gati./tvklan.al
