Deputeti i PD Ervin Salianji në fjalën e tij në mbledhjen e Grupit Parlamentar ka thënë se bashkimi i PD vjen duke u bërë një proces i përbashkët. Më tej ai i kërkoi ish-kryeministrit Berisha të ndalojë sulmet ndaj ambasadores Yuri Kim dhe çdo përfaqësuesi të Shteteve të Bashkuara. Salianji theksoi se “problemet ja kemi shkaktuar njeri-tjetrit dhe nuk mund të shpallim fajtorë ambasadorët për gabimet e dikujt”.
“Çdo mbledhje pa axhendë duket si mbledhje për axhenda okulte, produkti që jep kjo mbledhje nuk duhet të prodhojë me shume paqartësi, me shume mjegull dhe me shume ndasi! Personalizimi i mbledhjes i shërben krijimit te ndasisë dhe propagandimit në publik të ndarjes!
Duhet t’iu them disa elemente; ne kemi bërë një rrugëtim të ndryshëm për disa muaj; para 2 javëve ka pasur një vendim gjykate, njëra pale thotë nuk e njoh por ndërkohe prej dy javësh nuk e ka thërritur pjesën e grupit që mendon kështu, as kryesinë e partisë, nuk e ka mbledh as degët, çuditërisht dorëzuan dhe çelsat duke e bërë fakt vendimin! Gjendja dhe prania e çdo deputeti këtu ka bërë fakt një gjendje te re, sot gjendja faktike po tregohet nga të gjithë koleget që folën. Po i kërkohet Komisionit të Rithemelimit të bëjë pjesë të procesit deputetët dhe nuk po i kërkohet askujt tjetër. Problemi themelor që ka partia sot janë plagët në bazë, ne duhet t’i japim mundësi çdo demokrati të garojë në një proces të besueshëm dhe ku janë gjithë palët! Bashkimi vjen duke u bërë proces i përbashkët! Po ju kërkoj dhe diçka si kolege, secili prej jush është në të drejtën e vet për sa kohe flet në cilësi personale dhe jo në emër të grupit por zoti Berisha duhet të ndalen sulmet ndaj ambasadores amerikane dhe çdo perfaqesuesi të Shteteve të Bashkuara. Problemet ja kemi shkaktuar njeri-tjetrit, nuk mund të shpallim fajtore ambasadoret për gabimet e dikujt! Na ka ndarë jo mbështetja ndaj një personi, por mbështetja qe i kemi dhënë siglës dhe puna për demokratët!”, tha Salianji.
