Nënkryetari i grupit parlamentar të PD, Ervin Salianji, shprehet nga Korça se qytetarët do të vuajnë pasojat e krizës së thellë ekonomike dhe rritjes së çmimeve të produkteve bazë dhe karburanteve.
Përsa i përketë debateve brenda PD, Salianji tha se fokusi i opozitës mbetet largimi i Ramës dhe mbrojtja e qytetarëve nga vjedhja dhe abuzimi.
Lidhur me takimet që ish-kryeministri Sali Berisha po zhvillon me qytetarët në të gjithë Shqipërinë, deputeti deklaroi se ai është në shtëpinë e tij në PD dhe në këtë forcë politike nuk ndëshkohet askush që ka mendim ndryshe.
Sa i takon debateve me deputetin Edmond Spaho, Salianji tha se interesi i publikut nuk janë marrëdhëniet mes deputetëve, por gjendja e vështirë ekonomike, për të cilën PD ka propozuar 7 masa konkrete për të mbrojtur qytetarët.
“Ne nuk ndëshkojmë askënd për mendime, ne i dëgjojmë të gjitha. Në fund ka institucione që vendosin dhe ecim për të njëjtin drejtim për të rrëzuar regjimin e Ramës. Unë nuk jap dot qëndrime me pritshmëri. Sali Berisha është në shtëpinë e vet në PD dhe cilido, edhe njerëz të profilit shumë më të ulët, keni parë që në PD shprehin lirshëm mendimet, jo më lideri historik i saj, i cili ka trashëgimi pozitive jo vetëm për PD dhe jo vetëm. Edhe ata që do të jenë dhe që janë në takime i bëjnë nder PD dhe e nderojnë. Të gjithë punojnë së bashku për t’i shkurtuar ditët qeverisë së Ramës”, tha Salianji./ Opinion.al
