Ish kryeministri Sali Berisha ka qenë i drejtpërdrejtë në akuzat e tij ndaj Bashkimit Europian. Në një intervistë për il Giornale, botuar këtë të hënë, Berisha ka deklaruar se dhe Bashkimi Europian ka gabimet e veta në lidhje me Shqipërinë.
“Bashkimi Evropian nuk përjashtohet nga gabimet. Në raportin evropian të vitit 2016 për Shqipërinë, nuk u përmend asnjë nevojë urgjente për të luftuar drogën. Dukej si të ish shkruar në zyrën e Kryeministrit. Për më tepër, ish-ambasadorja e BE-së në Shqipëri, Romana Vlahutin, ishte implikuar në një skandal për blerjen e vendbanimit të saj zyrtar në rezidencën luksoze Rolling Hills. Vila e saj kushtoi 1.6 milionë euro, 4.700 euro për metër katror, ndërkohë që çmimet e tregut luhaten midis 1000 dhe 2000 euro për metër katror. Kjo ishte një blerje e dyshimtë që solli një hetim të brendshëm të Komitetit të Kontrollit të Buxhetit në BE”, ka thënë Berisha.
Sa i përkët mundësisë që vendi të marrë një dritë jeshile për negociatat, ish kryeministri thotë se çdo vit që kalon, Shqipëria largohet nga hyrja në Bashkimin Evropian.
“Kushtet e përcaktuara për anëtarësim nuk janë respektuar pothuajse asnjëherë. E vërteta është se Rama nuk ka asnjë interes që Shqipëria të anëtarësohet në BE, sepse është i vetëdijshëm se nëse kjo gjë ndodh sistemi që ka ndërtuar do të dështojë dhe fuqia e tij do të vendoset në rrezik”, thotë Berisha.
Për 30 Qershorin, Berisha mendon se Presidenti Ilir Meta zbatoi Kushtetutën, ndërsa kryeministri Edi Rama bëri “një grusht shteti të vërtetë”.
“Ai mbajti zgjedhje kundër ligjit dhe kushtetutës, duke krijuar kaos dhe duke ushqyer një klimë konfrontimi që ekzistonte. Zgjedhjet u mbajtën në qershor me një ngjyrë të vetme dhe sipas Konventës për të Drejtat e Njeriut, nuk mund të cilësohen aspak si demokratike. Në 57% të bashkive, u prezantua vetëm një kandidat nga Partia Socialiste e Ramës, duke shënuar kështu një shkelje të rëndë të të drejtave ndërkombëtare. Shqipëria është shndërruar në një vend diktatorial që bazohet në trafikun e drogës; është me të vërtetë një narko-shtet”./ Opinion.al
