Intervista e mbrëmshme e kryeministrit Rama në “Porta a Porta” në RAI 1, nisi duke folur për ekonominë e vendit, ku kryeministri ka treguar se taksat janë ulëta dhe ja vlen të investohet ndaj rreth 20 mijë italianë kishin bizneset e tyre në Shqipëri.
“Sot, kemi me Italinë një volum tregtar prej 2,6 miliardë eurosh në vit, eksportojmë 1,2 miliardë euro, që janë shifra që me siguri duhet të përmirësohen, por që japin një ide se si ka ndryshuar Shqipëria, që vitin e kaluar arriti rekordin me gjysmë milioni turistëve italianë. Në Shqipëri ka gati 20 mijë italianë që punojnë, që bëjnë biznes, me një sistem taksash, më lejoni të them, që në Itali as që mund të ëndërrohen.”, tha ndër të tjera Rama.
Ndërsa ambasadori italian Alberto Cuttillo në një intervistë për programin “Opinion”, më 31 janar të vitit 2019, foli dhe për numrin e italianëve që jetojnë e punojnë këtu duke dhënë një shifër tjetër, shumë më të ulët. Ai tha se në vend janë afërsisht 2 mijë italianë të regjistruar, por teksa supozoi se disa prej tyre nuk janë regjistruar akoma, tha se numri mund të arrijë në 3 mijë.
Pjesë nga intervista ku ambasadori Cuttillo flet për italianët në Shqipëri
Z.Ambasador, ne kemi patur një problem me median italiane që e shihte Shqipërinë vetëm nëpërmjet problemeve apo shfaqte vetëm gjërat negative. Tani po vihet re një ndryshim. Kur lexojmë shtypin italian, duket sikur Shqipëria është shndërruar në parajsë për italianët. Thuhet se 20 mijë italianë po jetojnë në Shqipëri këtu. Mua nuk më duket e vërtetë, vetëm nëse italianët kanë mësuar gjuhën shqipe, por… ama nuk më duken 20 mijë.
-Keni të drejtë. Shtypi në Itali, sikurse edhe në Shqipëri dhe për fat të mirë në të gjitha vendet e botës bazohet në opinione të ndryshme. Ka nga ata që shohin të mirën, por ka edhe nga ata që shohin të keqen. Është e vërtetë që nuk janë 20 mijë.
Ne si Ambasadë, si konsullatë kemi regjistrimet tona dhe na rezulton se janë afërsisht 2 mijë italianë. Le të supozojmë senuk janë regjistruar akoma, pra, mund të jenë 3 mijë.
Ama ka shumë italianë që vijnë në Shqipëri si turistë ose për punë. Nuk do të habitesha nëse në një ditë të vitit, dikush do të bënte llogaritë dhe atë ditë mund të jenë 20 mijë italianë në Shqipëri.
Çfarë bëjnë italianët që janë rezidentë në Shqipëri?
-Pjesa më e madhe punojnë këtu. Ka edhe nga ata që kanë zgjedhur të jetojnë këtu, por janë pak, sepse sinqerisht shërbimet sociale që Shqipëria ofron, sidomos në mjekësi nuk janë në lartësinë e duhur për të zëvendësuar ato që ofron Italia.
Ashtu siç shihet edhe nga përgjigjet e tyre kryeministri Rama dhe ambasadori Cuttillo flasin për shifra të ndryshme, ndaj pyetja që lind natyrshëm është, cili prej tyre ka thënë të vërtetën./Opinion.al
