Pas deklaratës së shefit të Kremlinit për të vendosur në një nivel më të lartë gatishmërie forcat e saj bërthamore, vjen edhe reagimi nga NATO. Në një dalje për CNN Sekretari i Përgjithshëm i Organizatës Jens Stoltenberg tha se ky është një hap i rrezikshëm, ndërsa pohoi se NATO do të shtojë mbështetjen për Ukrainën. “Aleatët e NATO-s po forcojnë mbështetjen e tyre politike dhe praktike për Ukrainën, ndërsa ajo vazhdon të mbrohet kundër pushtimit në shkallë të plotë të Rusisë. Mijëra armë antitank, qindra raketa të mbrojtjes ajrore dhe mijëra armë të vogla dhe municione po dërgohen në Ukrainë”.
NATO-ja e bën këtë duke shpjeguar se “Belgjika, Kanadaja, Republika Çeke, Estonia, Franca, Gjermania, Greqia, Letonia, Lituania, Holanda, Portugalia, Rumania, Sllovakia, Sllovenia, Mbretëria e Bashkuar dhe Shtetet e Bashkuara kanë dërguar tashmë ose janë ne miratimin e dërgesave të rëndësishme”, ndërkohë që “Italia po ofron mbështetje financiare”./Opinion.al
