Rusia i është përgjigjur sanksioneve të vendeve perëndimore pasi sulmoi Ukrainën. Autoriteti rus i Aviacionit Civil ka mbyllur hapësirën e tij ajrore për fluturimet nga transportuesit ose avionët e regjistruar në Bullgari, Poloni dhe Republikën Çeke.
“Ky vendim është marrë në përputhje me normat e së drejtës ndërkombëtare si përgjigje ndaj ndalimit të të gjitha fluturimeve civile të avionëve të operuar nga transportuesit ajrorë rusë dhe/ose të regjistruar në Rusi për/nga territori i këtyre shteteve”, deklaroi autoriteti i Aviacionit Civil Rus në një deklaratë të shtunën.
Të premten, Agjencia Federale e Rusisë për Transportin Ajror, Rosaviatsia, vendosi një ndalim për fluturimet e regjistruara në Mbretërinë e Bashkuar ose fluturimet e avionëve në pronësi, me qira ose të operuar nga një person i lidhur me Mbretërinë e Bashkuar që të kalojnë transit nëpër hapësirën ajrore të vendit. Ndalimi ishte në përgjigje të MB-së që ndalonte avionët civilë rusë nga hapësira e saj ajrore.
Ndërkohë, hapësira ajrore e Ukrainës është aktualisht e mbyllur për shkak të pushtimit rus. Fqinji i saj Moldavia gjithashtu ka mbyllur hapësirën ajrore, si dhe një pjesë e Bjellorusisë. Për më tepër, Administrata Federale e Aviacionit e qeverisë amerikane u ka thënë pilotëve amerikanë që të shmangin “të gjithë shtetin e Ukrainës, të gjithë shtetin e Bjellorusisë dhe një pjesë perëndimore të Rusisë”.
