Zëdhënësi, rus Dmitry Peskov ka hedhur poshtë raportet e inteligjencës amerikane se Rusia ka një listë të ukrainasve që do të vrasë ose do të dërgojë në kampe, nëse pushtojnë vendin. Ai i ka cilësuar këto pretendime si gënjeshtra.
Në një letër drejtuar shefes së OKB-së për të drejtat e njeriut, Michelle Bachelet, ambasadorja e Uashingtonit në OKB shkroi se forcat ruse po krijojnë lista të ukrainasve, të cilët Rusia do t’i torturojë, vrasë dhe zhdukë.
Ambasada amerikane në Moskë, gjithashtu, paralajmëroi qytetarët e saj që të kenë plane evakuimi për shkak të rreziqeve për sulme të mundshme në vende publike në Rusi.
Zëdhënësi, rus u tha gazetarëve se situata në Ukrainën lindore mbetet “e tensionuar”.
Por ndërsa Kremlini ka mohuar të ketë plane konkrete për një samit midis presidentëve të SHBA-së dhe Rusisë, ai tha se mbetet i hapur për bisedime.
“Ekziston mirëkuptimi se dialogu duhet të vazhdojë në nivelin e ministrave të jashtëm”, tha Peskov.
“Nëse është e nevojshme, natyrisht, presidentët rus dhe amerikan mund të vendosin të mbajnë një telefonatë ose të lidhen në forma të tjera komunikimi.”/Opinion.al
