Shqipëria nuk duhet të tolerojë një demokraci të negociuar përmes dhunës. Ky është titulli i një artikulli të publikuar dje në U.S.News nga Rudina Hajdari.
Kryetarja e grupit parlamentar demokrat përmend thirrjet e diplomatëve të huaj ndaj politikës shqipëtare për të ulur tensionet. Ajo fokusohet veçanërisht në deklaratën e zëvendës ndihmës sekretarit Mathew Palmer i cili dënoi shfaqjet e dhunës në protestat e opozitës. Më tej Hajdari shton se vendimi i Presidentit Meta për anullimin e datës së zgjedhjeve ishte anti-kushtetues dhe se kjo gjë nuk e ndihmon situatën në vend. Artikulli vazhdon me akuzat që i janë ngritur së fundmi kryetarit të opozitës Lulzim Basha, e kjo gjë thjeshtë fakton sipas saj se të dyja palët politike janë të përfshira në korrupsion.
Ajo që bën çudi në këtë artikull është se në përshkrimin e autores Rudina Hajdari, ajo rezulton si “liderja e Partisë Demokratike dhe e opozitës parlamentare”. Në fakt ajo është përjashtuar nga strukturat e PD pas vendimit për të mos bojkotuar parlamentin.
Nuk dihet nëse U.S.News nuk ka qenë vërtet i pa informuar për statusin që ka deputetja Hajdari në politikën shqiptare apo ka qenë vetë ajo që e ka vetë shpallur veten kryetare të Partisë Demokratike. /Opinion.al
