Sport

“Arena Kombëtare” mund të mos jetë gati as në shtator


               Publikuar në : 13:03 - 18/06/19 |
Al Do

Stadiumi i ri kombëtar mund të mos jetë gati as në shtator. Presidenti i FSHF, Armando Duka u shpreh me dyshime për mbylljen e punimeve brenda afatit.

Ndërtimi i stadiumit “Arena Kombëtare” ka kaluar çdo afat për përfundimin e tij. Fillimisht u pretendua se ai do të përfundonte në fund të 2018, më pas vet kryeministri Rama theksoi se sportdashësit do ta kishin gati stadiumin në Qershor dhe shtyrja më e fundit ishte Shatori i 2019-ës.

Në lidhje me afatin e fundit Duka tha se nuk mund të jemi shumë të sigurt për Shtatorin megjithëse po bëjmë të gjitha përpjekjet që ta arrijë këtë afat.

 “Shumë kush e sheh gjysmë plot dhe gjysmë bosh për çka i përket termave kohorë për Shtatorin. Ne i kemi vënë objektiv kompanisë që duam të luajmë në Shtator dhe me të vërtetë e kemi shumë të domosdoshme të luajmë në Shtator në këtë stadium jo vetëm sepse duam ta shijojmë stadiumin e ri, duam të kemi kushte sa më të mira për spektatorin, por duam të arrijmë më shumë rezultat në praninë e më shumë spektatorëve dhe me një atmosferë akoma më të mirë. Kështu që do bëjmë të gjitha përpjekjet dhe kompania gjithashtu po bën të gjitha përpjekjet, por nuk mund të jemi shumë të sigurt për Shtatorin”, tha ai.

Ndërtimi i stadiumit të ri ka kushtuar 60 milion euro dhe ndërtimi i tij ka nisur që në 2016. Ndeshja e parë që pritet ta inaugurojë atë është ajo mes Francës dhe Shqipërisë për eleminatoret e Europianit 2020. /Opinion.al

Pas