Kreu i Kuvendit, Gramoz Ruçi i ka kërkuar sot kryetares së KLGJ, Neureda Llagami plotësimin e Gjykatës së Lartë dhe atë Kushtetuese.
Pas raportimit të KLP dhe KLGJ për punën e bërë gjatë vitit 2019-të, kryeparlamentari Ruçi tha me tone disi të ashpra se Shqipëria nuk duhet të mbahet peng deri në Bruksel për mos plotësimin e gjykatave.
“Të shpallen të gjitha vendet e lira në gjykatën e Lartë. Ju këtë cështje e latë të fundit, Kuvendi është i interesuar për gjithcka, por në radhë të parë edhe Kuvendi edhe publiku edhe partnerët janë të interesuar kur do të plotësohen vakancat në gjykatën e Lartë dhe Kushtetuese.
Nuk ka asnjë arsye, as ligjore që ju mos hapjen e të gjitha vendeve, të mbahet peng Shqipëria deri në Bruksel për këtë cështje.
Lidhur me këtë rezolutë që Kuvendi do të votojë sot, Kuvendi dhe seanca e posacme për këtë cështje, kur themi të hapen menjëherë dhe përfundojë sa më shpejt, të mos jemi të okupohet një mbledhje e posacme e Kuvendit vetëm për këtë, mos-hapjen e vendeve vakante”,- tha Ruçi.
Nga ana e saj Kryetarja e Këshillit të Lartë Gjyqësor Naureda Llagami u shpreh se një numër i vogël gjyqtarësh janë konfirmuar për plotësimin e vendeve vakante dhe se stoku i dosjeve në Gjykatën e Lartë është shtuar me 5654 çështje duke çuar në mbi 34300.
“Sot janë 34300 çështje në total për të gjykuar në Gjykatën e Lartë. 5654 iu shtuan stokut vitin e fundit. 3 kandidatë u emëruan me dekret te presidentit, një është në shqyrtim.
KLGJ-ja hartoi edhe bazën ligjore për ngritjen në detyrë të gjyqtarëve për ta plotësuar me gjyqtarë karriere, kemi hapur garën për 6 vende, kanë aplikuar vetëm 12 kandidatë, të njëjtët që kanë aplikuar më parë.
Aktualisht kemi një numër të vogël gjyqtarësh, nga 103 gjyqtarë vetëm 29 janë konfirmuar, 18 plotësojnë kriteret e eksperiencës. Numër i vogël kandidatësh që kufizon mundësinë e përzgjedhjes. Për pasoja procesi mund të cilësohet si i paracaktuar” tha ajo. /Opinion.al
