Një rrokadë e vertetë drejtorësh sapo ka nisur. Deri më tani kemi 3 drejtorë të shkarkuar që kanë qenë emëruar nga Damian Gjiknuri. Por burimet për Opinion.al thanë se numri është disa herë më i madh. Pra në ditët në vijim do të presim dhe shkarkime të tjera kryesisht nga dikasteret e Energjetikës dhe Ekonomisë.
Le të ndalim pak te prurjet e reja. Pas shkarkimit të Afrim Bakajt, Drejtor i Përgjithshëm i Autoritetit Portual Durrës është propozuar Agron Tare. Ai ka qenë deri më tani konsull i Shqipërisë në Stamboll dhe mbështetës i fortë i PS-së në zgjedhje.
Ndërsa dje është larguar drejtori i Operatorit të Transmetit të Energjisë (OST), Gentian Gradeci. Pasi doli lajmi për shkarkimin e tij, Gradeci nxitoi të bëjë një deklaratë në facebook, duke shpjeguar se ka dhënë dorëheqjen për arsye personale. OST u përmend në skandalin e kompanisë DH Albania e cila me dokumente false kishte fituar tenderin e Unazës së Re, 19 mln euro dhe një tender në OST me vlerë 11 mln euro. Në vend të tij, ministrja Balluku, ka propozuar emrin e Skerdi Drenovës. Ky i fundit është personazh më i njohur mediatik, pasi për disa vite ka qenë zv/drejtor i Top Channel. Dy vitet e fundit Skerdi Drenova ka punuar pranë Bashkisë së Tiranës si Kryeinspektor i Mbrojtjes së Territorit.
Sot është shkarkuar dhe drejtori i Përgjithshëm i Autoritetit Rrugor Shqiptar, Afrim Qendro. Burimet thanë se shkarkimi i tij ka ardhur pas skandalit të tenderit të Unazës së Re. Në vend të zotit Qendro në një prej drejtorive më problematike në vend, është emëruar znj. Sonila Qato. Themi problematike pasi dy drejtorë të mëparshëm të Rrugëve, janë në hetim nga prokuroria për abuzime me tenderat. Drejtoresha e re, znj. Qato deri dje ka qenë ministre e për Mbrojtjen e Sipërmarrjes. Më herët në vitet 2013-2017, Qato ka shërbyer si Drejtore e Përgjithshme e Agjencisë së Trajtimit të Pronave (ATP).
Për dy emrat e parë, drejtorin e Portit dhe drejtorin e OST-së ligjërisht propozon ministrja dhe miraton këshilli mbikëqyrës,
ndërsa drejtori i rrugëve është në varësi direkte të ministres. /Ri-De
Sonila Qato
Skerdi Drenova
Agron Tare
