Monopatinat elektrike, të cilat hynë në qarkullim si simbol i teknologjisë moderne urbane dhe si mjete ekologjike, po përballen me ndalime dhe kufizime të forta në shumë qytete dhe shtete në mbarë botën.
Nga Parisi në Maltë, nga Melburni në Singapor, siguria publike po merr prioritet mbi inovacionin.
Që nga 1 Shtatori i vitit 2023, monopatinat me qira janë të ndaluara në Paris. Vendimi u mor me anë të një referendumi qytetar, ku 90 % e votuesve u shprehën kundër.
Autoritetet raportuan rritje të aksidenteve, kaos në hapësirat publike dhe shkelje të vazhdueshme të rregullave të qarkullimit nga përdoruesit e monopatinave.
Por në Mars të vitit 2024, Malta bëri një hap drastik, duke ndaluar të gjitha monopatinat me qira në të gjithë vendin.
Ministri i Transportit deklaroi se shërbimet me qira për monopatina elektrike ishin kthyer në burim problemesh për qytetarët dhe se operatorët nuk kishin respektuar rregullat bazë.
Përdorimi privat është ende i lejuar, por me kufizime të forta.
Me mbi 1,600 raste aksidentesh të rënda dhe disa humbje jete të lidhura me monopatinat, Finlanda vendosi në Qershor 2025 që personat nën 15 vjeç nuk mund t’i përdorin më këto mjete.
Gjithashtu, monopatinat nuk mund të qarkullojnë pa një licencë të veçantë nga bashkitë përkatëse.
Ligji i ri kërkon gjithashtu kufizim të shpejtësisë në 25 km/h dhe ndalon përdorimin nën efektin e alkoolit.
Qyteti i Melburnit në Australi, ndaloi në Gusht 2024 monopatinat me qira në rrugët e tij, pas një viti me qindra ankesa, 256 të aksidentuar dhe 1 viktimë.
Autoritetet thanë se operatoret nuk kishin zbatuar standardet e sigurisë dhe qyteti nuk kishte kapacitet të menaxhonte përhapjen kaotike të tyre.
Në Irlandë, monopatinat janë ndaluar në të gjitha format e transportit publik, për shkak të rrezikut të shpërthimeve nga bateritë.
Po ashtu, në Britaninë e Madhe, monopatinat private nuk janë të lejuara në rrugë apo trotuare, përveç programeve pilot të kufizuara në disa qytete.
Singapori ishte ndër të parët që ndaloi përdorimin e monopatinave në trotuare, që në Nëntor 2019, pas një numri aksidentesh me pasoja fatale. Ato lejohen vetëm në rruge të caktuara dhe me standarde të larta sigurie.
Megjithëse monopatinat elektrike promovohen si alternativa të pastra për transportin urban, realiteti ka treguar se mungesa e rregullave strikte, mbikëqyrja e dobët dhe mosrespektimi i hapësirave publike i ka kthyer ato në burim aksidentesh dhe në rrezik për qarkullimin.
