Kryeministri Edi Rama prezantoi sot ekipin e Partisë Socialiste për 11 majin, në podcastin “Flasim”, për rreth 10 orë transmetim.
Rama pati të ftuar 80 kandidatët për deputetë të Partisë Socialiste, në podcast i cili u mbyll gjatë pasdites me një video të tij, ku u shfaq me stafin i cili kujdeset për të drejtuar transmetimin teknik.
Ndër të tjera ai i është drejtuar autorit të emisionit Opinion në Tv Klan, Blendi Fevziu, ku thotë se ka intervistuar 80 persona në transmetim maratonë për më shumë se 9 orë.
Kreu i qeverisë sqaroi edhe njëherë se synimi i PS, për marrjen e një mandati të katërt është për të bërë të mundur integrimin e Shqipërisë në Bashkimin Europian.
“Ja pra 9 orë e 43 minuta, unë, një tavolinë, dy kamera, tre çuna. Këta të dy këtu dhe qerosi që iku për iftar. Edhe një kompjuter këtu pa luajtur nga vendi. Fevzi, 80 të ftuar Fevzi, se ti i bën me regjistrim dhe pastaj bën sikur del Live edhe thonë si rri ky Fevziu.
80 të ftuar o Fevzi, edhe për çfarë? Për këtë, kjo është Republika e Shqipërisë ne do ta bëjmë Europian Union Republic of Albania dhe në momentin që çdo shqiptar dhe shqiptare do ta marrë këtë atëherë askush nuk sheh dot më nga lart-poshtë, mua jo e jo se nuk më shohin dot, por asnjërin nga ju dhe do të jemi që të gjithë të lara përpara atyre që na e kanë lënë amanet Shqipërinë në maj dhe të gjithë atyre që u kemi borxh, të gjithë fëmijëve të këtij vendi”, u shpreh Rama.
