Në konferencën e përbashkët për shtyp më homologun hungarez, Viktor Orbán, kryeministri Edi Rama ka bëre edhe një here thirrje për lirimin e tre efektivëve të policisë së Kosovës, të arrestuar pak ditë më parë.
Sipas tij, zgjidhja është ofruar nga bashkësia euroatlantike me pika shumë të qarta dhe të palëvizshme.
Rama thekson se vetë KFOR nuk do të dalë me konkluzione publike, por se dosja do t’i dërgohet NATO-s.
Ai thotë se fokusi është që të bëhet paqja në tryezë, të cilën bashkësia ndërkombëtare ia ka dhënë si zgjidhje Kosovës.
Rama nënvizon faktin se marrëveshja që është në tavolinë nuk është e thënë që të jetë aty përgjithmonë, për këtë arsye thotë ai situatat duhet të ndryshojnë,.
“Është imediate nevoja, urgjenca që të tre punonjësit e policisë së Kosovës të kthehen në shtëpi. Përtej pretendimeve që janë kapur këtu apo atje, për të cilat KFOR nuk do t’i japë konkluzion publik por do të depozitojë dosjen përkatëse në NATO, është e qartë se në të gjitha rastet tre efektivët nuk kanë bërë asnjë krim. Edhe nëse do të supozonim se kanë shkelur kufirin, ka vetëm një përgjigje; kthimin e tyre në shtëpi. Jemi të fokusuar që ta bëjmë këtë të mundur. Po përdorim të gjithë kanalet e mundshme që ta bëjmë sa më parë. Një zgjedhje të përbashkët? Është zgjidhja e ofruar nga bashkësia euroatlantike me pikat shumë të qarta dhe të palëvizshme. Me rëndësi është se paqja është në tryezë, dokumenti i marrëveshjes është në tryezë dhe mundësia historike po ashtu. Për të mbuluar një kapitull të gjatë dhe të dhimbshëm, për ta bërë Kosovën një vend të njohur ndërkombëtarisht nga të gjithë dhe nga Serbia. Është kaq e madhe kjo mundësi, sa të tjerat janë produkt i një devijimi të panevojshëm nga fokusi.
Fokusi është që të bëhet paqja në tryezë. Bashkësia ndërkombëtare ia ka dhënë në tryezë Kosovës zgjidhjen. Ndaj edhe një gjë do të shtoja, s’kam eksperiencën e kryeministrit, por besoj se mund ta them me plot gojë. Ajo marrëveshje që është në tavolinë nuk është e thënë që të jetë aty përgjithmonë. Situatat mund të ndryshojë, konjukturat mund të ndryshojnë dhe mund të hyjmë në një tjetër kohë të gjatë në histori, ku nuk do të kemi zgjidhje. Të tjerat, po i përsëris, mund të jenë pilula ekzaltimi për atë që identifikojnë veten si patriotë në luftëra imagjinare, por larg boshtit”, tha ai./Opinion.al
