Historia e Dhimitër Falos është treguar mbrëmjen e së martës në emisionin “Opinion” nga nipi i tij Anton Falo. Gjatë një udhëtimi në Voskopojë, gazetari Blendi Fevziu është ndalur edhe një familje të vjetër voskopojare, dhe pikërisht tek Anton Falo. Ai rrëfeu përpara kamerës se është nipi i Dhimitër Falos, një nga militantët e parë komunistë në Shqipëri, i pushkatuar më pas nga regjimi.
“Për ata që nuk e dinë, Dhimitër Falo ishte një nga militantët e parë komunistë, bashkë me Llazar Fundon, Ali Kelmendin, Demir Godellin”, tha Blendi Fevziu.
Anton Falo: Ishte puro komunist, si ata komunistët tamam.
Fevziu: Keni patur probleme gjatë komunizmit?
Anton Falo: Shumë. Kur e pushkatuan atë, e lanë 3-4 ditë të qelbej në më mes të sheshit. E varrosën në një vend që nuk e dinte asnjë, vetëm sigurimi i shtetit . Pastaj në një kohë të mëvonshme me një mik që kishim atje në degën e brendshme, na tregoi dhe vajti natën im atë mori gjysmat e kockave, nga frika se mos e zinin atje.
Fevziu: Natën e hapi varrin? Ku është varrosur tani?
Anton Falo: Tani është në krah të babait. Plumbin e kishte akoma brenda në kafkë. Se e pushkatuan nga pas dhe nuk kishte dalë plumbi. Me gjithë plumb e gjetëm. Kafkën e gjetëm. /Opinion.al
