I penduari i mafies italiane “Ndrageta” ka rrëfyer për lidhjet e organizatës kriminale me Shqipërinë, ku ishte parashikuar një investim prej 18 milionë eurosh, me qëllim pastrimin e parave.
Sipas mediave italiane, biznesmeni i penduar Pino Giglio, i dënuar me 12 vjet e 6 muaj, ka zbuluar dhe sistemin e ryshfetit në Shqipëri. Sipas Giglios, ‘Ndrageta’ ishte e gatshme për të investuar në Shqipëri dhe për këtë do të paguanin ryshfet për dy zyrtarë të qeverisë, të cilët kishin kërkuar 10% të kontratës.
Bëhej fjalë për një investim 18 milionë euro, një autostradë pranë Tiranës, në vitin 2011. Madje këta biznesmenë të “Ndrageta”-s kanë udhëtuar drejt Shqipërisë në atë kohë, raporton BW.
Mes tyre, si ndërlidhës ishte një polic i cili kishte kërkuar 10 mijë euro. Në Shqipëri Pino Giglio dhe një tjetër person i quajtur, Paquale Rilo, i cili merrej me transaksione fiktive krijuan një shoqëri, ‘Italcantier’, së bashku me një shqiptar me inicialet R. M.
Së bashku ata ishin gati të futeshin në një biznes fitimpurës duke i paguar ryshfet dy zyrtarëve të qeverisë. E kur të nënshkruhej kontrata zyrtarët do të likuidoheshin me 10% të vlerës totale. E duke qenë se flitet për kantierë me vlerë rreth 18 milionë euro është e qartë që edhe shifra do të ishte edhe më e madhe. Në aferën shqiptare përfshihet edhe biznesmeni Augusto Bianchini.
Sipas mediave italiane, i penduari Giglio thotë se bëhet fjalë për një aferë të vitit 2011 dhe se ishin projekte që ishin bërë së bashku me Bianchinin, njeriu i përzgjedhur nga grupi mafioz Ndragheta. Ky i fundit, pasi projektoi planet shtroi disa pyetje teknike për të parë nëse kjo punë do të ishte fitimprurëse. E për këtë arsye grupi i Giglio udhëtoi drejt Shqipërisë.
E në atë kohë në avionët që udhëtonin nga Bolonja dhe Milano drejt Shqipërisë ishte gjithmonë një polic, i cili sipas të penduarit Giglio, ishte gjithmonë në kontakt me shqiptarët dhe kishte thënë se është paguar me 5% të vlerës së kontratës. “Por mesa duket ky biznes nuk u konkretizua asnjëherë edhe pse pati ankesa nga pala shqiptare”-shkruajnë mediat italiane
