Mesa duket drejtuesit e ekipit të Romës e kanë kuptuar gabimin që kanë bërë pak ditë më parë për largimin kapitenit DeRosi. Por pikërisht kur jehona e koreve dhe ofendimeve ndaj drejtuesve dukej se nuk do të ndalej, vjen një lajm shpresëdhënës. Drejtori i ri teknik i kryeqytetasve do të jetë legjenda e ekipit Francesco Totti.
Ky emërim vjen për të hapur siparin e një revolucioni që drejtuesit e Romës kërkojnë të bëjnë. Një tjetër ndryshim që pritet të ndodhë është ai i drejtorit sportiv. Emri që pritet t’i bashkohet Totit në drejtimin e politikave të klubit është Petrachi, por që më parë duhet të zgjidhë kontratën që ka me Torinon.
Detyra e parë e ish-kapitenit roman është gjetja e një trajneri të ri. Opsionet që janë duke u konsideruar me prioritet janë trajneri aktual i Atalantës, Gasperini por dhe Maurizzio Sarri. Ky i fundit duket gjithnjë e më largë pankinës së Chelsea. Sipas Calcciomercato në rast se këto dy plane dështojnë Toti do të provojë të afrojë trajnerin e Leeds, Marcelo Bielsa. /Opinion.al
