Më shumë se një shekull pas zhdukjes së Titanikut në Atlantikun Verior, një tjetër traget trans-oqeanik do të riprodhohet nën modelin e “gjigandit” të mbytur.
Prodhimi i ri i anijes është një ide e hershme e miliarderit australian, Clive Palmer dhe do të quhet “Titanic 2”. Projekti pritet të konkretizohet në vitin 2018. Në pamje të parë “Titanik 2” do të jetë identik me variantin e parë, por sipas projektit, ai do të jetë rreth 4 metër më i gjerë dhe i pajisur me të gjitha pajisjet moderne dixhitale të navigimit dhe ato të sigurisë detare.
Sipas mediave britanike, “Titanik 2” do të jetë 270 metra i gjatë dhe do të peshojë 40 mijë tonë. Në ndryshim nga origjinali, anija e re do të ketë numrin e mjaftueshëm të varkave të shpëtimit, shoqëruar me sistemet e evakuuimit.
Në një intervistë për “Independent” James McDonald, drejtues i kompanisë Blue Line që do të financojë projektin, tha se udhëtimi i parë i “Titanik 2” nuk do të jetë nga Southhampton për në New York, sikundër “Titanik 1”, por nga Xhiangsu në lindje të Kinës, për në Dubai. Gjigandi Titanik doli në det të hapur më 10 prill 1912, ai u përplas me një akullnajë në Atlantikun Verior, një tragjedi ku humbën jetën më shumë se 1500 pasagjerë. /Tv Klan
