Kriza është edhe mundësi, tha kryeministri Rama sot në fjalën e tij gjatë prezantimit të planit të rindërtimit për zonën e Kombinatit në kryeqytet, e cila u dëmtua rëndë nga tërmeti i 26 Nëntorit të viti të shkuar.
“Kriza është edhe mundësi për ata që kanë vullnetin për të rezistuar, transformimi i krizave në mundësi është një mundësi e vetme.”, tha Rama.
Projekti i prezantuar sot për Kombinatin parashikon akomodimin në banesa të reja për 20 mijë e 500 banorë. Aty do të ndërtohen gjithashtu 4 institucione arsimore, 9 pika social kulturore dhe 5 sheshe publike.
Kryeministri Rama nuk u ndal vetëm në zonën e Kombinatit gjatë fjalës së tij. Ai theksoi se projektet e rindërtimit do të synojnë përveç akomodimit të familjeve që humbën shtëpitë, edhe një rivitalizim të këtyre zonave.
“Sot jemi gati për të nisur punën për ti dhënë Laçit një impuls të ri. Në atë zonë (Kisha e Shna Ndohut) kalojnë çdo vit, mbi 1 milionë vizitorë, por ata nuk ndalen kurrë në Laç. Me ndërhyrjen e re që do të ndodhë jo vetëm do të sistemohen familjet që humbën shtëpitë, jo vetëm që do të krijohen kushte të reja jetese, por aty me siguri do të krijohen kushtet për t’i mbajtur vizitorët më shumë dhe kjo do të sjellë më shumë ekonomi.
E njejta gjë mund të thuhet edhe për Thumanën.
Të gjithë do të hyjnë pa përjashtim në shtëpi të reja dhe më të bukura dhe jo të rrethuar nga xhungla ndërtimesh kuturu”, tha Rama duke nënvizuar se edhe në zona të tjera si Durrës dhe Krujë do të nisin projektet e reja.
Ai iu përgjigj gjithashtu akuzave se ka ende njerëz në çadra dhe se puna ende nuk ka filluar në kantierët e zonave të goditura nga tërmeti.
“Ne sot po përjetojmë rritjen e temperaturave dhe nuk ka ditë që unë të mos mendoj që në ndërkohë që në shtëpitë tona është, se unë nuk jam edhe përdorues i ajërit të kondicionuar, është rritur temperatrua, ka ende familje të tëra që vazhdojnë në çadra. Mirëkuptoj stresin dhe padurimin.
Për të shkuar deri tek shtëpia e ndërtuar është një proces i tërë në rast se ne duam që të dalim shumë më të mirë, shumë më të fortë sa ç’ishim në ato territore ku goditi tërmeti. Është një proces i plotë planifikimi që ka të bëjë me territorin, pronën, shpronësimet por lidhet edhe vetë me gjeologjinë. Paralelisht janë proceset e garave të cilat një pjesë janë mbyllur një pjesë janë në proces dhe një pjesë ende nuk janë hapur. Pastaj janë projektet e zbatimit.
Sidoqoftë duhet durim edhe me sigur të gjitha këto pamje që sot janë 3d të kthehen në realitet. Të gjitha 3d që ekspozojmë janë pjesë e projekteve. Çfardo qoftë që ndërtojmë nuk fillon kur hapen themelet.”, shtoi Rama.
Ai akuzoi më tej qeverinë e kaluar për projektet infrastukturore të cilat i konsideroi “të lëna rrugëve” dhe të ndërtuara pa leje.
“Ne nuk futemi në kantier si hordhi ndërtuesish. I falet njerëzve dhe familjeve ajo që ka ndodhur në Shqipëri në vitet 90 por jo shtetit dhe familjes që kanë ndërtuar pa leje.”, tha kryeministri i cili në fund të fjalës së tij shtoi se shpreson që kantirëve të rindërtimit t’i jepet sa më shpejtë jetë sepse, siç tha ai “ne jemi atdheu i Shën Thomait po nuk prekëm nuk besojmë”. /Opinion.al
