Lulzim Basha ka akuzuar disa herë publikisht se pas tenderit shumëmilionësh të inceneratorëve fshihen Rama dhe Ahmetaj, por mbrëmë këtë akuzë e përforcoi me emra: “Klodian Zoto, pronari i inceneratorëve ka qenë në makinë me Ahmetaj në aksidentin e Maqedonisë”, u shpreh Basha i ftuar në emisionin “Studio e Hapur”.
I menjëhershëm ishte reagimi i ministri Ahmetaj: “Nese Klodian Zoto ka qene ne makine me mua ne aksident (apo ndonjehere ne makine me mua), une jap doreheqjen. Nese jo, ti Luli e jep doreheqjen?”
I gjithë debati u zhvillua në distancë në orët e vona të ditës së djeshme. Ishte ora 23:00 kur Basha akuzoi nga TV, ndërsa Ahmetaj u përgjigj përmes një reagimi për mediat në 23:30.
Basha nuk e la me keq, kur kishte kaluar ora 00:00 deklaron: “Je për burg jo për dorëheqje! Klodian Zoto eshte njeriu yt tek kompania “Hermes”, tek “Check up” ka vene emrin për 3 inceneratoret për llogarine tende! Je per burg Arben, jo per doreheqje!”.
Klodian Zoto është përfolur edhe më herët në media si biznesmeni që përfitoi pa garë 178 milionë euro për ndërtimin e tre inceneratorëve në Fier, Elbasan dhe Tirane.
Pak ditë më parë, drejtori i Departamentit të Mjedisit në PD, Jamarbër Malltezi deklaroi: “Klodian Zoto është sekseri i Arben Ahmetaj nga ku janë marrë miliona euro nga buxheti i shtetit. Ky person ka qenë menaxher dhe në vjedhjen e Vilma Nushit. Zoto çdo një muaj nxjerr nga një kompani të re.Këtu po vidhen 178 mijë euro dhe po mbahet si sekret shtetëror pasi po i jepen sekserit të Ben Ahmetajt”.
