Dhuna ndaj turistëve spanjollë dhe video me pamje si në filmat aksion ku pronari i lokalit “Panorma” në Porto Palermo, Mihal Kokëdhima kapet pas kofanos së makinës nuk mund të mos ndikonin në biznesin e tij.
Aktiviteti i biznesit është ndërprerë ndërkohë burime nga Bashkia e Himarës bëjnë me dije të dhëna që e rëndojnë edhe më shumë situatën e tij. Sipas bashkisë, godina e restorantit dhe e hotelit janë pa leje ndërtimi por në proces legalizimi. Gjithashtu rezulton se Kokëdhima nuk ka paguar asnjë taksë për biznesin e tij. Nëse ky biznes nuk do të legalizohet brenda pak ditëve atëherë sipas burimeve të pushtetit vendor godina mund të shembet.
Plazhi ngjitur me biznesin këtë të hënë është i liruar nga shezlongët dhe çadrat dhe mund të përdoret nga çdo pushues.
Ndaj Mihal Kokëdhimës Gjykata e Vlorës dha masën “arrest me burg” për 3 akuza, “Kanosje”, “Dëmtime të tjera me dashje” dhe “Shkatërrim te pronës”. /Opinion.al
