Ditën e sotme ishte parashikuar që të zhvillohej takimi i radhës në tryezën për Reformën Zgjedhore.
Por me kërkesë të Opozitës së bashkuar takimi është shtyrë për ditën e hënë.
Lajmin e ka konfirmuar edhe bashkë-kryetarja e komisionin për Reformën, Rudina Hajdari. Në një intervistë televizive mëngjesin e sotëm ajo tha se nuk e kishte pritur mirë shtyrjen e takimit dhe uroi që të mos kishte bojkot.
“Ka patur disa zhvillime momentet e fundit. Opozita e bashkuar e ka anuluar takimin e ditës së sotme, duke e shtyrë për të hënën. Nuk është mirë që të shtyhen takimet, pasi 15 marsi është javën tjetër. Ishte ditë e rëndësishme, sidomos për mua, duke qenë se sot do të flitej për ndryshimin e sistemit, por mbrëmë në darkë vonë erdhi njoftimi se do të shtyhet takimi. Urojmë që të mos jetë bojkot, por ndihem e shqetësuar për këtë fakt sepse është hera e dytë që tema e ndryshimit të sistemit shtyhet. Duhet të kuptojmë që kjo reformë bëhet për shqiptarët dhe ashtu siç kemi dëgjuar propozimet e opozitës dhe kemi qenë të hapur, edhe opozita duhet të ketë durim dhe të dëgjojë propozimin e opozitës në Parlament dhe shqetësimet e saj”, deklaroi Hajdari.
Në takimin e sotëm mes palëve do të flitej për çështjen e administratës dhe sistemit zgjedhor. Të dyja këto janë cështje ‘të nxehta’ pasi nga njëra anë priten propozimet për sjelljen dhe depolitizimin e administratës zgjedhore e cila gjithmonë ka nxitur debat mes palëve. Çështja tjetër me interes është ajo e sistemit zgjedhor e cila është kërkuar më fortë nga opozita parlamentare.
Takimi i radhës do të zhvillohet me të njëjtin rend ditë në orën 10:00 ditën e hënë. /Opinion.al
