Prezenca e OSBE-së në Shqipëri ka ftuar palët politike në Shqipëri në një tryezë për reformën zgjedhore. Ajo thotë se është e gatshme të mbështesë autoritetet shqiptare për të përfunduar reformën zgjedhore në kohë dhe në mënyrë gjithëpërfshirëse, ku të adresohen të gjitha rekomandimet e OSBE-ODIHR dhe ato të palëve.
Për këtë ftesë i pari që reagoi ishte lideri i PD-së, Lulzim Basha. Ai u pyet nga gazetarët pas aktivitetit të Bashkimit të Sindikatave të Pavarura të Shqipërisë dhe deklaroi: “Po ti shikojmë ftesat se ftesat po bëhen javë për javë. Do t’i shikojmë, do t’i vlerësojmë, zgjidhja e krizës politike është prioriteti ynë. Natyrisht jemi të angazhuar edhe për reformën Zgjedhore. Por, askush të mos ketë iluzione se zgjidhja e krizës politike kërkon shumë më shumë se sa një tryezë tjetër”.
Pak orë më vonë reagoi kryeministri Edi Rama. Në një ftesë publike, shpërndarë në rrjetet sociale ai iu drejtohet liderëve të opozitës joparlamentare. Rama thekson se pavarësisht kundërshtive, ai nuk mund të zhbëjë ekzistencën e opozitës joparlamentare.
“Ju drejtohem publikisht në përpjekjen për të krijuar një hapësirë dialogu e ndërveprimi mes nesh, lidhur me një sfidë të përbashkët të një rëndësie kombëtare, Reformën Zgjedhore. Kundërshtitë tona në aspektin politik janë botërisht të njohura dhe pozicionet respektive, në raport me hapësirën institucionale të vendit po ashtu. Sidoqoftë, përtej skajshmërisë së dallimeve tona, ne as nuk e kemi zgjedhur njëri-tjetrin dhe as nuk e zhbëjmë dot ekzistencën e njëri-tjetrit. Pra jemi të dënuar të bashkëjetojmë pavarësisht jopëlqyeshmërisë reciproke, për sa kohë të tjerët, zgjedhësit, na kanë dhënë mandate përfaqësimi, disave për të qeverisur e disave për të bërë opozitë”, shkruan Rama.
Duke theksuar se zgjedhjet e ardhshme do të jenë në qershor të 2021, Rama shkruan se Kuvendi ka rezervuar një vend të posaçëm për opozitën joparlamentare, në Komisionin e Reformës Zgjedhore. Rama thekson se është gati për dialog, për reformën zgjedhore pa kushte!
“Procesi ka nisur në Kuvend me opozitën parlamentare dhe do të mbyllet në Kuvend natyrisht, por mungesa juaj ne institucionin më të lartë vendimmarrës të republikës, nuk ju përjashton vetvetiu nga hapësira e diskutimit për Reformën Zgjedhore. Përkundrazi. Të paktën ky është opinioni im dhe duke vënë re edhe mungesën tuaj në vetë tryezën e Komisionit Zgjedhor, ju ftoj të takohemi e të bashkëbisedojmë për këtë sfidë të përbashkët, në çdo kohë e vend që do t’ju vinte për shtat – sigurisht në rast se ju jeni të interesuar të përfshiheni në këtë proces. Pa kushte”.
