Lulzim Basha ishte i drejtpërdrejtë në përgjigjen ndaj kryeministrit Edi Rama, i cili i bëri ftesë për dialog pa kushte në lidhje me reformën zgjedhore.
Lideri i PD-së tha qartë se ftesat publike janë provokim, në kohën kur i dyshuari i dosjes 184, Damian Gjiknuri është bashkëkryetari i komisionit për reformën zgjedhore.
Sipas Bashës, nëse duhet dialog atëherë kryeministri duhet të veprojë, pasi theksoi se opozita nuk është ajo po që pengon dialogun.
“Sot prioritet është zgjidhja e krizës, kriza ekonomike nuk zgjidhet pa zgjidhur krizën politike, zgjidhja e krizës politike është prioritet absolut i PD opozitës së bashkuar. Krizën nuk e ka shkaktuar kodi zgjedhor, kushtetuta dhe ligjet e Shqipërisë, ato s’janë përgjegjëse për Kajmakun, Babanin, Pjetrin, as për vjedhjen e votave në zgjedhjet moniste të 30 qershorit. S’mund të fshihemi pas letrave e fletërrufeve politike, as pas provokimeve, se nëse reforma zgjedhore vjen me ftesë nga Damian Gjiknuri që është i dyshuari kryesor në dosjen 184, le të ftojnë edhe Ymer Lalën, dhe Enver Bajrin, Emiljano Shullazin, Avdylajt se kjo është një tallje, një provokim për të gjithë shqiptarët. Opozita ka përgatitur një platformë për reformën zgjedhore, një transformim të thellë politike ta çojë vendimmarrjen te qytetarët shqiptarë, dhe e dyta të krijojë mekanizmat me anë të cilave kurrë më mos përsëritet një situatë e tillë që të kapen institucionet”, tha Basha.
Po aq i drejtpërdrejtë ishte kreu i PD-së edhe me OSBE-në Tiranë, e cila ishte ajo që kërkoi një tyrezë për reformën zgjedhore. Basha tha se si fillim priste të dëgjonte një reagim nga OSBE për raportin e OSBE/ OHDIR në lidhje me zgjedhjet e 30 qershorit, për tre kryebashkiakët, sipas tij me rekorde kriminale dhe dhe shkeljet e rënda të kushtetutës dhe të ligjit./ Opinion.al
