A ka politikanë që po punojnë kundër Reformës në Drejtësi dhe si po ecën kjo reformë? Gjon Juncaj, prokuror në SHBA, dikur ish-agjent i FBI, ka punuar për disa vite si ekspert i OPDAT në Shqipëri. Në një intervistë të dhënë për emisionin 31 minuta në “RTSH”, Juncaj në një pjesë të bisedës ka folur edhe për politikanët që përpiqen ti vendosin stërkëmbësh Reformës në Drejtësi.
Pjesë e shkëputur nga intervista
A mendoni se paketa e reformës në drejtësi do të funksionojë, do të zbatohet? Ka prekur në publik jetën e shumë personave, mënyra se si u miratua në Parlament, se si sistemi filloj të funksionojë hap pas hapi. Institucionet e reja që presin të ndërtohen nga kjo paketë. Kështu që a mendoni se në fund të fundit do të kemi zbatim të plotë të reformës në drejtësi?
Po ashtu mendoj. Ka shumë njerëz që janë përgjegjës për këtë. Mendoj se nëse politikanët dhe politika duan që reforma në drejtësi të dalë me suksese, do të ketë sukses. Dhe nga ana tjetër mendoj se të gjithë jemi në një mendje se reforma në drejtësi është rruga më e mirë përpara.
Po ashtu, mendoj se nëse politikanët duan që reforma në drejtësi të ketë sukses, më lejoni që të jem i qartë për këtë: Ajo prapë do të ketë sukses. Sepse populli shqiptar e mbështet, Shtetet e Bashkuara të Amerikës e mbështesin, komuniteti ndërkombëtar e mbështet. Në këtë kontekst, unë reformën në drejtësi e shoh si një tren që po lëviz përpara dhe ose do të jesh në tren ose do të jesh në shina përpara trenit. Por në finale lëvizja është përpara.
Cilat janë pengesat për ngritjen e Strukturës së Posaçme Antikorrupsion dhe Byrosë Kombëtare të Hetimit?
Sigurisht që duhet të mbajmë parasysh se Struktura e Posaçme Antikorrupsion, Byroja Kombëtare e Hetimit, Prokuroria e Posaçme përparësia kryesore e këtyre institucioneve jetike është që t’i kundërvihen korrupsionit, sidomos korrupsionit në nivelin e lartë dhe krimin e organizuar. Dhe të gjithë ata persona që do të preken do të bëjnë gjithçka që munden për ta penguar përparimin e reformës, përfshi këtu edhe njerëz që janë duke e mbështetur publikisht, por që në prapaskenë kanë plane të tjera.
Megjithatë, jam i bindur se prapëseprapë reforma në drejtësi do të ecë përpara. Ai tren tashmë ecën përpara. Mund t’iu them dhe garantoj se Shtetet e Bashkuara të Amerikës do të mbeten të përkushtuara ndaj atij misioni, që është përmbyllja me sukses e reformës në drejtësi.
Ambasada e SHBA-së nuk u largua bashkë me ambasadorin Donald Lu. Ky është një prioritet i Shteteve të Bashkuar të Amerikës. Ne do të trajnojmë, këshillojmë dhe do të mbështesim, madje edhe do të vëzhgojmë gjatë gjithë rrugës lidhur me Strukturën e Posaçme Antikorrupsion dhe Byronë Kombëtare të Hetimit.
