Ndeshjet e zhvilluara në International Champions Cup mund të mos kenë shkuar ashtu siç donte Real Madrid, që i ka humbur të tre takimet, por trajneri Zinedine Zidane dhe lojtarët e tij besojnë se do të jenë gati për përballjen e radhës me Manchester United (fitoi me penallti në Amerikë) me rastin e Superkupës së Europës. Kjo ndeshje do të zhvillohet 8 gushtin e ardhshëm në Shkup dhe asnjë nga lojtarët e madrilenëve nuk ka dyshime se kampionët e Europës do të jenë gati për titullin e parë të sezonit.
“Kur luhet për një titull, atëherë gjithçka ndryshon dhe ne po punojmë shumë mirë për të qenë gati për 8 gushtin”, ka thënë kapiteni i Real Madrid, Sergio Ramos. “Los Blancos” kanë zhvilluar paraqitje zhgënjyese në fazën parapërgatitore edhe në të kaluarën, por kanë shkëlqyer me fillimin e sezonit. Ata shpresojnë të bëjnë të njëjtën gjë edhe këtë vit, teksa synojnë të fitojnë të realizojnë gjashtëshen historike të trofeve.
Fakti se dy prej lojtarëve që kanë luajtur më mirë në humbjen 3-2 të pësuar kundër Barcelona-s kanë qenë Mateo Kovacic dhe Marco Asensio, ka përforcuar idenë se rezervat e Real Madrid kanë talentin e duhur për ta ndihmuar ekipin të shkojë drejt një sezoni të lavdishëm, siç kanë bërë sezonin e kaluar, duke fituar Superkupën e Europës, Botërorin për Klube, La Liga-n dhe Champions League. Dani Ceballos, Jesus Vallejo dhe Marcos Llorente nuk kanë pasur kohën e mjaftueshme në dispozicion për të treguar atë që mund të bëjnë, por pritet që ata të luajnë një rol shumë të rëndësishëm në këtë sezon. Edhe lojtarë të rinj, si Oscar, Quezada dhe Franchu kanë treguar se Real ka një të ardhme të shndritshme.
