Protestat anti-raciste të nisura në Shtetet e Bashkuara pas vdekjes së George Floyd janë përhapur tashmë edhe në vendet europiane, veçanërisht në Britaninë e Madhe.
Manifestimet me moton “Jetët e personave me ngjyrë kanë vlerë” vazhdojnë të mbahen në Europë.
Protestuesit mbushën rrugët e Brukselit, Kopenhagenit, Londrës, Budapestit, Madridit e Barcelonës, për të kundërshtuar diskriminimin racor.
Të pakën 150 persona janë ndaluar nga policia në Bruksel si pasojë e incidenteve të ndodhura mes një grupi manifestuesish dhe policisë pasi një grup i dhunshëm protestuesish ka sulmuar policinë dhe dyqanet përreth.
Po ashtu dhe britanikët sfiduan paralajmërimet e autoriteteve për të shmangur grumbullimet masive për shkak të pandemisë, duke dalë për të dytën ditë radhazi në rrugë me thirrjet “Heshtja është dhunë”, “Ngjyra nuk është krim”.
Protesta pati edhe në Itali, me rreth 3 000 njerëz që u mblodhën në Piazza del Popolo në Romë, me slogane kundër racizmit./Opinion.al
