Gjatë fjalës së tij në prezantimin e raportit të OECD mbi rezultatet e Anketës Ndërkombëtare të Mësimdhënies dhe të Nxënit (TALIS), Kryeministri Edi Rama theksoi rëndësinë e mbështetjes së mësuesve të rinj, uljes së ngarkesës së punës dhe integrimit të teknologjisë në procesin mësimor. Ai u shpreh se shqetësimi për largimin potencial të mësuesve të rinj nga profesioni, për shkak të mungesës së mbështetjes, është një sinjal që qeveria e merr seriozisht.
Kryeministri vlerësoi progresin e bërë në rivendosjen e autoritetit të mësuesit dhe garantimin e sigurisë në vendin e punës, si dhe theksoi nevojën për nxitjen e programeve në art dhe zeje. Rama e cilësoi raportin si një moment pozitiv për arsimin dhe falënderoi mësuesit për kontributin e tyre, duke nënvizuar se sfidat e reja kërkojnë bashkëpunim, përkushtim dhe mbështetje të vazhdueshme.
“Mbështetja e mësuesve të rinj, ulja e ngarkesës së punës dhe integrimi gjithnjë dhe më i madh i teknologjisë janë objektiva që duhet t’i ndjekim bashkërisht. Ka një shqetësim që ne nuk na gjen të papërgatitur, është që një pjesë e mësuesve të rinj, raportojnë që mund ta lënë profesionin nëse nuk ndjehen të mbështetur të mjaftueshëm. Është një sinjal që ne e marrim shumë seriozisht. Angazhimi i vazhdueshëm i mësuesve është objektiv që konfirmohet edhe nga anketimi. Sot është një ditë e bukur për të celebruar diçka pozitive, që raporti i këtij anketimi e nënvizon.
Është një ditë për të falënderuar të gjithë mësuesit-et e kësaj Shqipërie, që na keni nderuar në këtë proces. Rivënia në vend e autoritetit të mësuesit është një sfidë shumë e madhe dhe e gjejmë shumë të lënduar. Sepse mësuesit nuk kishin asnjë garanci për vendin e punës, gjithçka e kishin të lidhur me teslën e partisë. Kurse sot jeni të paprekshëm në vendin tuaj të punës, pavarësisht bindjeve politike që keni. Nuk as lëvizje të mësuesve nga një vend në tjetrin. Duhet t’i jepet një shtysë më e madhe programit të arteve dhe të zejeve. Duhet të mendojmë edhe për shpërblimin ekstra që do të merren me këtë program.
E kuptoj gjithë vështirësinë për t’u përballur me ata çerrat, që janë ndryshe nga ç’kemi qenë ne. Kanë informacion shumë më shumë se ne, por më të pakontrolluar. Vijnë me shokun në xhep (telefona), sa dalin nga shkolla bëjnë një jetë tjetër. Megjithatë kjo është sfida, fakti që ne e dimë është gjysma e punës. Duhet të punojmë sa më shumë me njëri-tjetrin. Sa më shumë përkushtim, motivim dhe padiskutim që ne jemi në mbështetjen tuaj”, tha kryeministri Rama.
