Debatit nëse kishte apo jo kallëzim penal ndaj drejtuesve të CEZ shpërndarje për keqmenaxhim të kompanisë në dëm të konsumatorëve shqiptarë i jep përgjigje, kallëzimi penal prej 11 faqesh i përgatitur nga Avokatia e Shtetit Ledina Mandia në vitin 2013, e cila më pas ia ka kaluar për hetim Prokurorisë së Rrethit Gjyqësor Tiranë, Seksionit Task Force. Por çfarë thuhet në këtë raport voluminoz? Që në fillim të raportit vihet në dukje veprimet e kundraligjshme të personave në drejtim të “CEZ shpërndarje” në dobi të interesave pasurore të shoqërisë çeke CEZ a.s, si keqmenaxhimi me qëllim për ta çuar në falimentim, duke përdorur uljen e nivelit maksimal të mbrojtes në fidera të ndryshëm me qëllim shkaktimin e ndërprerjes kolektive të energjisë kolektive. Po ashtu një nga shkeljet e konstatuara është edhe mbifaturimi i vazhdueshëm që CEZ u bënte kompanive “Albpetrol sh.a” dhe “Ujësjellës-Kanalizime”, me qëllim përfitimin e paligjshëm. Ndërkohë që Enti Rregullator i Energjisë, konstatonte transferime të vazhdueshme parash nga “CEZ sh.a”, jashtë territorit të vendit.
