Kryeministri Rama ka mbajtur sot një fjalim në mbledhjen e konstituimit të Këshillit të ri Bashkiak në Tiranë dhe betimit të kryebashkiakut Veliaj.
Rama tha se Këshilli i shkuar bashkiak ka qenë peng i një politike bllokuese por kjo gjë nuk ka bllokuar vendimmarrjen. Ai i ka kërkuar kujdes anëtarëve të këshillit që numrat e sotëm të sjellin mungesën e debatit dhe i kërkoi gjithashtu përfaqësisë së re opozitare të marrin pjesë në shkëmbimin e ideve pavarësisht numrit të vogël në këshill
Uroj që përfaqësinë e re opozitare në këtë kuvend tuajin të mos e masni me peshën e vogël të numrit të saj, por me peshën e vullnetit të mirë për të dëgjuar zërin e saj për të përfituar bërjen e punës së mirë të përbashkët. Këshilli i shkuar ka qenë rëndom peng i politikë dhe është bllokuar me urdhra nga jashtë kësaj salle, por kjo nuk e ka penguar vendimmarrjen. Por kujdes njësoj e dëmshme do të ishte njësoj sikur numrat e sotme të sillnin mungesën e debatit dhe të prodhonin vendime në mungesë transparente. Askush nuk duhet ta harrojë se në 30 qershor banorët e Tiranës, votuan për të drejtën jo thjesht për të majtës. Duke marrë këtë në mendje, duhet të udhëheq çdo ditë punën tonë”, tha Rama.
Kryeministri bëri një pasqyrë krahasuese midis bashkisë së drejtuar nga Veliaj dhe katërvjeçarit të drejtuar nga Lulzim Basha. Ai theksoi se bashkia e drejtuar nga PD ka arkëtuar 5 herë më pak taksa nga lejet e ndërtimit nga sa ka mbledhur bashkia në drejtimin e Veliajt. Rama foli gjithashtu për akuzat e opozitës për ndërtimin e kullave në kryeqytet, duke i quajtur akuzat si baltë të opozitës dhe duke shtuar se kullat do të vazhdojnë të ndërtohen në Tiranë për sa kohë të kenë vlera arkitektonike më ato që janë ndërtuar deri tani.
“Kulla i kanë bërë si bukë, PPP si djathë. Unë numëroj vetëm 2 kulla, Plazën dhe Kulla në ndërtim, 2 kulla e stadiumit dhe ajo te banka e Shqipërisë, 4 kulla dhe 4 miliardë llafe për kullëzimin apokaliptik të Tiranës. 880 mijë m2 në vetëm 85 leje, ndërsa Veliaj, 130 m2 më pak për 100 leje ndërtimi më shumë. Leje më të vogla për më shumë ndërtues dhe më shumë përfituese”, tha Rama.
Në fjalën e tij kryeministri tha se oligarkët që pretendon opozita nuk ekzistojnë dhe shtoi se tashmë ata taksohen më shumë se në kohën kur bashkia drejtohej nga Basha.
“Më lejoni ta filloj nga të ashtuquajturit oligarkë, njerëzit e pasur të këtij vendi, disa emra syresh që përtypen dhe ripërtypen si tagjia e gojës së dëshpëruar të opozitës sonë kryesore, në përpjekjen e saj të pandërprerë që shpif e shpif e diçka do mbetet. Rëndom, ndërtimtaria është tabela e preferuar e baltëqitjes së tyre, ku sipas avazit të vjetër, çdo leje ndërtimi është një aferë dhe çdo kullë që ndërtohet është një skëterrë. Sa i paguanin të ashtuquajturit oligarkë, arkës së kryeqytetit deri dje, për një leje ndërtimi? 4% të çmimit të shitjes. Po sot? 8% të çmimit të shitjes. Pra kemi dyfishuar taksën ndaj atyre që përflitemi se u shërbejmë” tha Rama.
Rama paralajmëroi krijimin e formeve të debatit me qytetarët një herë në muaj në mënyrë që të adresohen problemet e cdo qytetari.
Unë dua t’ju nxis që sot të hartoni një plan të ri angazhimi me komunitetet dhe të njësive bashkiake të gjithë Tiranës së madhe në këtë Këshill të vogël. Me katër vjeçarin e shkuar, ku thuaj se e gjithë barra e komunikimit ka qenë barrë e kryetarit të Bashkisë. Ne do të krijojmë forumet e debatit komunitar në çdo njësi bashkiake, për çdo komunitet dhe qytetar që ka dëshirë të marrë pjesë në to dhe të thotë fjalën e tij. Ju duhet të kujdeseni që të paktën një herë në muaj këto forume jo vetëm të mblidhen, por të sillni në institucione zërin e çdo komuniteti, hallin e çdo banori, sikletet e çdo sipërmarrësi. Krijimi i urave të reja me ta duhet të jetë prioritet i prioriteteve për çdo Këshill Bashkiak. E papranueshme që kontributi i Këshillit të jetë thjesht pjesëmarrja, e pakuptueshme që Këshilltarët të mos njohin territorin e tyre elektoral, të mos jenë pika e referimit të ço banori, që të mos kenë në celular asnjë mesazh apo thirrje nga zona e tyre”, u shpreh kryeministri. /Opinion.al
