Për Lulzim Bashën ndalimi i Vangjush Dakos që të mos hyjë në SHBA është lajm i mirë por fakti që ai nuk ka dalë akoma përpara drejtësisë në Shqipëri sipas tij është një lajm i keq.
Kreu i opozitës ka reaguar për shpalljen non grata të ish-kryebashkiakut të Durrësit me arsyetimin se mund të jetë përfshirë në afera korrupsioni. Ai është jo vetëm i korruptuar sipas Bashës por pjesë e krimit të organizuar dhe i përfshirë në vjedhje votash për llogari të Edi Ramës.
Basha shkruan se Vangjush Dako ka patur gjithmonë si mburojë paprekshmërie nga drejtësia kryeministrin Rama. Ky i fundit e ka mbrojtur atë sipas kreut të PD edhe kur gazeta BILD publikoi përgjimet se Dako ishte i përfshirë në krime elektorale. Kjo bëhet, shkruan Basha, pasi Rama “ka të qartë se as nuk e merr dhe as nuk e mban dot pushtetin pa krimin”.
Postimi i Lulzim Bashës
Është lajm i mirë që Shtetet e Bashkuara të Amerikës kanë shpallur non grata Vangjush Dakon për “përfshirje në raste të mëdha korrupsioni.” Është lajm i keq që Vangjush Dako nuk ka dalë akoma para drejtësisë për asnjë rast korrupsioni.
Vangjush Dako nuk është vetëm një politikan i korruptuar. Ai është pjesë e krimit te organizuar, në bashkëpunim me të cilin vodhi zgjedhjet për llogari të pushtetit të Edi Ramës. Si shpërblim, Vamgjush Dako i dorëzoi krimit të organizuar kontrollin ekonomik dhe politik të Bashkisë së Durrësit.
Është lajm i keq që Vangjush Dako ka si mburojë paprekshmërie nga drejtësia kryeministrin e vendit, Edi Rama. Veprat e mëdha të korrupsionit janë bërë nën mbrojtjen, me dijeninë dhe për përfitimin e Edi Ramës. Është Edi Rama ai që e mbron Vangjush Dakon apo siç e quajnë miqtë e tij, bankomatin personal të parave të pista të Edi Ramës.
Përpara ligjit dhe Kushtetutës, Edi Rama zgjodhi gjithmonë Dakon, edhe kur gazeta gjermane BILD tregoi bashkëpunimin direkt me krimin e organizuar për të blerë zgjedhjet në 2017. Edi Rama i mbron kriminelët e tij, brenda dhe jashtë politikës, sepse ai e ka të qartë se as nuk e merr dhe as nuk e mban dot pushtetin pa krimin.
Prandaj, largimi i Edi Ramës është zgjidhja për të shkëputur lidhjet e politikës me krimin, për të vënë qeverinë në interes të qytetarëve, jo të krimit dhe të oligarkëve me të cilët vjedh çdo ditë shqiptarët. /Opinion.al
